DILI, 18 agostu 2022 (TATOLI)—Líder Nasionál no eis-Primeiru-Ministru (PM), Xanana Gusmão, konsidera polítika Estadu liuhosi Prezidente Repúblika (PR), José Ramos Horta, ne’ebé iha inisiativa promove rekonsiliasaun hodi rekonsilia Timoroan iha Timor Osidentál tuir dokumentu fraternidade umana ne’e hanesan parte ida atu hametin unidade no fraternidade.
Notísia Relevante: PR Horta: tempu ona hatudu Timor-Leste nia onestidade kona-ba rekonsiliasaun
“Ita hala’o daudaun, dalaruma ita hakarak hala’o buat ida boot tebe-tebes. Ita hala’o neineik uitoan, importante liu mak se tinan-tinan ita hala’o fraternidade umana sei sai di’ak liután, hodi hametin unidade no fraternidade,” Xanana Gusmão hateten ba jornalista sira hafoin enkontru ho Xefe Estadu iha Palásiu Prezidensiál Nicolau Lobato, Bairru Pite, kinta ne’e.
Líder nasionál ne’e husu ba Prezidente Repúblika, José Ramos Horta, atu kontinua promove rekonsiliasaun iha kada tinan Timor-Leste hala’o fraternidade umana sei sai di’ak liután.
“Ida ne’e tinan-tinan Prezidente Repúblika kontinua nafatin, hodi hatudu nafatin katak iha Timor problema bele entre arte-marsiál maibé entre relijiaun ne’e tenke hametin,” nia hateten.
PR Horta “briefing” Xanana Gusmão
Iha enkontru ne’e Prezidente Repúblika, José Ramos Horta, mós briefing (instrusaun) ka fó hanoin balun ba lidér nasionál Xanana Gusmão ne’ebé reprezenta hanesan enviadu espesiál Xefe Estadu nian hodi partisipa serimónia investidura Kardwál, Don Virgílio do Carmo da Silva, SDB, iha loron 27 agostu 2022 iha Vatikanu, Roma.
“Ita-boot sira (jornalista) hatene Prezidente Repúblika indika ha’u sai ninia reprezentante atu ba Vátikanu, Roma, bainhira Don Virgílio sai Kardeál, ne’ebé ohin ami ko’alia kona-ba ida-ne’e,” Xanana hateten
Tanba ne’e, Xanana sei dezloka bá Roma, maibé antes partisipa serimónia investidura Xanana ho reprezentante órgaun soberania Timor-Leste nian sei halo audiénsia ho Amu Papa, Francisco iha Roma.
Notísia Relevante: Papa Francisco hato’o karta audiénsia ba órgaun soberania Timor-Leste
“Tanba enkontru ho Amu Papa ne’ebé ha’u ba la’ós ha’u-nia an maibé hasoru reprezentante Prezidente Repúblika nian, ne’ebé ha’u husu Prezidente Repúblika atu dehan saida ba Amu Papa iha audiénsia ne’e nia laran,” nia hateten.
Eis PM ne’e hatutan, klaru ho Amu Papa sei ko’alia kona-ba dokumentu fraternidade umana ne’ebé Timor-Leste hanesan nasaun dahuluk adota liuhosi aprovasaun rezolusaun Parlamentu Nasionál (PN) nian.
Notísia Relevante:PN aprova pedidu PR Horta vizita Indonézia ho unanimidade
“Klaru, buat ida boot tebe-tebes, ita-boot (jornalista) temi dokumentu fraternidade umana ita-boot (jornalista) bá Osana ka lae, la bá labele, loron rua tutuir malu kalan boot iha ne’eba, iha Osana ne’eba ko’alia kona-ba Musulmanu, Hindu, Protestante, ho tan seluk tan. Iha ne’eba, sira hotu prepara an kuandu fila-fali iha fali tan segundu faze ne’ebé ita-nia maluk musulmana, protestante sira foin primeira vez iha ne’eba ladun preparadu,” nia hateten.
Nune’e, Xanana dehan dokumentu ne’e Timoir-Leste hahú hala’o daudaun oinsá hala’o fraternidade umana ne’e sai di’ak liután.
“Prezidente Repúblika mós fó hatene hau hodi bele ba mós Amu Papa katak ita la’ós de’it dokumentu ida-ne’e (dokumentu fraternidade umana) maibé ita hala’o daudaun. Dala ruma ita hakarak hala’o buat ida boot tebe-tebes, ita hala’o neineik uitoan, importante liu mak se tinan-tinan ita hala’o fraternidade umana sei sai di’ak liután,” Xanana hateten.
Durante sorumutu, PR mós hato’o no hakarak Vise Primeiru-Ministru hosi Vátikanu nian sei hala’o vizita mai Timor-Leste.
“Prezidente Repúblika dehan Vise Primeiru-Ministru hosi Vátikanu nian atu mai keta ko’alia kona-ba fraternidade umana no buat sira ne’e hotu. Fraternidade umana ida inisia iha Osana ne’e atu taka karik tenke ho Vise Primeiru-Ministru hosi Vátikanu nian mai taka hodi bele hatudu katak ita la halo buat boot no la halo buat barak, maibé la’o nene’ik hodi hametin unidade, fraternidade,” Xanana dehan.
Iha parte seluk, Xanana Gusmão sente kontente nune’e hakarak agradese ba Amu Papa Francisco bele hili mós Kardeál Don Vigílio do Carmo da Silva, SDB, iha istória sai kardeál dahuluk Timor-Leste nian.
Notísia Relevante: Konseitu rekonsiliasaun transforma ona iha relatóriu CAVR “Chega!”
Jornalista : Nelson de Sousa
Editór : Cancio Ximenes
