DILI, 19 agostu 2022 (TATOLI)— Jenerál Tentara Nasionál Indonézia (TNI), Muhamad Andika Perkasa, hateten TNI prontu apoia hodi dezemvolve komponente Terrestre, Komponente Navál no Aéreu iha FALINTIL-Forsa Defeza Timor-Leste (F-FDTL), nune’e ba futuru bele hala’o serbisu ho profisionál liután.
Jenerál TNI Andika Prakasa hato’o kompromisu ne’e bainhira presenza iha Timor-Leste hodi hatan konvite hosi Xefe Estadu Maiór Jenerál F-FDTL, Tenente Jenerál Falur Ratek Laek atu partisipa aniversáriu komemorasaun loron FALINTIL ba dala 47.
“Ha’u ho Tenente Jenerál Falur ko’alia asuntu kooperasaun téknika militár nian no ami hakarak aloka orsamentu atu apoia dezenvolvimentu F-FDTL nia iha área Komponente Terrestre, Navál no Aéreu,” Jenerál TNI Andika Perkasa hafoin halo vizita ba iha Kuartel F-FDTL, sesta ne’e.
“Tanba ne’e, ha’u lori staff atu haree kooperasaun sira ne’e ninian implementasaun tanba tinan oin bele hahú implementa ona F-FDTL bele haruka nia membru sira atu halo estudu ba iha área komponente tolu ne’e,” nia hatutan.
Tuir jenerál TNI ne’e katak, daudaun ne’e dezenvolvimentu F-FDTL nian sei foka liuba iha komponente terrestre, tanba ne’e TNI hakarak apoia másimu hodi dezenvolve komponente tolu iha F-FDTL no sei envolve F-FDTL iha treinamentu militár Garuda Ship ne’ebé sei hala’o iha tinan oin.
“Ha’u ho Tenente Jenerál Falur ko’alia sei halo kontaktu direita ho nia, iha buat balun kona-ba atividade ilísitu mosu iha área fronteira mak TNI prontu hodi prevene atku ilísitu iha fronteira,” afirma Jenerál TNI Andika Perkasa.
Iha fatin hanesan, Xefe Estadu Maiór Jenerál F-FDTL, Tenente Jenerál Falur Rate Laek, hateten, nia parte sente kontente no apresia ba vizita ne’e Jenerál TNI Andika Perkasa hodi diskute kooperasaun bilateral.
“Iha vizita ne’e, TNI kompromete apoia F-FDTL ba nia dezenvolvimentu sira liuliu iha fomasaun militár, tékniku militár ba membru F-FDTL sira,” Tenente Falur agradese.
“Ita tenke kria koopersaun ho ema hotu. Ita nia ema antes ne’e ita haruka 200 ba estudu kona-ba militár nia iha Indonézia. Maibé tinan oin sira hakarak simu tan ema barak ba eskola iha nivél superiór nian iha akademia militár Indonézia, Lembaga Ketahanan Nasionásl (LEMHANAS) no Sekolah Khusus Komandu nia no TNI mak selu,” katak Tenenete Jenerál ne’e.
Jornalista: Natalino Costa
Editór : Florencio Miranda Ximenes
