iklan

NASIONÁL, EDUKASAUN

CNC fó formasaun hakerek istória ba estudante eskola São José Operáriu

CNC fó formasaun hakerek istória ba estudante eskola São José Operáriu

Centro Nacional Chega (CNC), kuarta ne’e, fó formasaun hakerek istória ba estudante sira hosi Eskola Sekundária São José Operáriu. Imajen Tatoli/Nelia Fernandes.

DILI, 07 setembru 2022 (TATOLI)—Centro Nacional Chega (CNC), kuarta ne’e, fó formasaun hakerek istória ba estudante sira hosi Eskola Sekundária São José Operáriu, atu iha kuñesimentu kona-ba hakerek istória.

Notísia Relevante: CNC preokupa ho jerasaun tuan sira-nia memória istória pasada

Centro Nacional Chega (CNC), kuarta ne’e, fó formasaun hakerek istória ba estudante sira hosi Eskola Sekundária São José Operáriu. Imajen Tatoli/Nelia Fernandes.

“Formasaun ne’e, nu’udar meiu edukativu aproximasaun hanorin ba estudante sira oinsá bele hakerek sira-nia inan-aman nia istória rasik. Ho objetivu, ita halo toman ita-nia estudante sira atu hakerek la’ós atu lee de’it ema-nia istória maibé tenke halo toman sira hakerek,” Diretór Divizaun Edukasaun no Formasaun, Vicente Borges Maia, hateten ba Agência Tatoli, iha nia kna’ar fatin Antigu Komarka, Balide, Díli.

Nia esplika, iha Timor-Leste ema barak iha istória maibé dala ruma istória ne’e ba ema boot sira de’it, hanesan maun boot Xanana Gusmão no ema líder polítika sira, maibé ba ema baibain ne’e la naran hakerek ida.

“Entaun, ida ne’e meiu ida atu halo balansu narativu kona-ba istória. Katak, ita-nia luta ba ukun an ne’e ema dehan luta populár, la’ós luta lori de’it kilat maibé partisipasaun povu nian hosi kontribui no partisipa iha funu direta. Balun ajuda ai-han, ai-moruk no roupa durante períodu ne’e tomak. Ho ida-ne’e, ita ida-idak ho nia istória, entaun ho meiu ida-ne’e estudante sira bele rona sira-nia inan-aman no sira-nia família nia partisipasaun no kontribuisaun durante luta, sira halo saida ba ukun an ne’e,” nia esplika.

Tanba, nia dehan, baibain bainhira rona tiha ema ida-nia istória bele mós haluha, maibé ho hakerek bele kontribui ba istóriadór sira, ema bele halibur informasaun no depois hakerek istória ho loloos.

“Aleinde ne’e, ba duni familia rasik hanesan husik hela ba oan sira, bei’oan no família sira bele lee atu aban bainrua sira laiha ona, sira bele iha matéria,” nia dehan.

Maske nune’e, programa formasaun ba hakerek istória ne’e la’ós foin dahuluk hala’o maibé formasaun ne’e hahú kedas iha tinan 2018, tanba eskola barak ona mak CNC fó formasaun ba estudante sira, depois koopera ho profesór sira atu fasilita, tau matan no rekolla.

Entaun, hosi formasaun ne’ebé estudante sira hetan, bele grava inan no aman nia istória depois hakerek tanba bainhira hakerek istória hotu sei lori mai CNC atu kompilla ba livru ida depois publika.

“La’ós istória hout-hotu CNC bele publika maibé CNC sei haree hakerek ne’e tuir kritéria ka lae. Tanba, hakerek istória ne’e afeta ba ema-nia moris, hanesan kona-ba nia esperiénsia violasaun direitu umanus iha pasada tanba nia kontribuisaun. Entaun, istória ne’e bele publika maibé ami sempre iha aseitasaun ida kuandu oan sira entrevista sira-nia inan-aman, CNC iha nota ida atu inan-aman sira bele asina katak istória ne’e bele publika ka lae.

“CNC ne’e atu prezerva ema-nia istória, atu rai iha Arkivu CNC. Se sira ne’ebé hakarak publika laiha problema, ami pronto tanba ida-ne’e iha termu aseitasaun,” nia dehan.

Kona-ba matéria formasaun, nia dehan, iha formasaun ne’e matéria importante mak bainhira hakerek istória, nia tenke iha informasaun detallu kona-ba istória na’in.

“Hanesan naran kompletu, hela fatin, nia involvimentu sá tinan, kodigu saida, violasaun saida mak nia hetan, iha períodu independénsia ne’e saida mak nia hetan no istória ne’e hetan ona públikasaun ka lae. Entaun ho buat sira-ne’e mak sai matéria importante ba estudante sira, bainhira atu hakerek istória,” nia dehan.

Profesór Asuntu Estudántil iha Eskola São José Operáriu, Julio Sarmento Barros, sente orgullu bele hetan fiar hosi Centro Nacional Chega (CNC) atu estudante sira apreende oinsá hakerek istória iha CNC.

“Ami sente orgullu tanba bele hetan fiar hosi CNC atu kapasita ami-nia estudante sira, la’ós de’it iha eskola maibé ami bele aproveita tempu hanesan ne’e hodi kapasita sira oinsá bele prepara an atu hakerek buat ruma. Entaun ho ida-ne’e ami-nia esperiénsa ba estudante sira katak sira-nia akompañamentu iha formasaun ne’e la’o ho di’ak atu depois bele hakerek buat ruma. La’ós tuir de’it formasaun maibé lahó rezultadu hakerek, ne’e problema ida. Tanba ne’e, ami espera, ba oin ami-nia estudante bele hakerek buat ruma hodi prezerva iha fatin liu-liu ba biblioteka, nune’e estudante seluk tuir mai bele lee,” nia dehan.

Entretantu, totál estudante ne’ebé partisipa formasaun ne’e hamutuk 100 ne’ebé mai hosi Ensinu Sekundáriu São José Operáriu, ema-nain 50 hosi desimo ano no 50 hosi desimo primeiru ano, kompostu hosi Siénsia Téknolojia no Siénsia Sosiál Umanidade.

Jornalista : Nelia Fernandes

Editór      : Cancio Ximenes

iklan
iklan

Leave a Reply

iklan
error: Content is protected !!