OÉ-CUSSE, 16 setembru 2022 (TATOLI)– Ministériu Turizmu Komérsiu no Indústria (MTKI), liuhosi Diresaun Nasionál Regulasaun Komersiál, akompaña hosi Autoridade Rejiaun Administrativa Espesiál Oé-Cusse Ambeno (RAEOA), sesta ne’e realiza semináriu hodi divulga lei númeru 08/2016, kona-bá protesaun Konsumidór no dekretu-lei númeru 29/2011 kona-bá presu justu ba setór privadu sira iha rejiaun ne’e.
Diretór Nasionál Regulasaun Komersiál, Bertinetti Veira Lobo Baptista, apresia no agradese ba operadór ekonómiku sira iha RAEOA, mai hosi emprezáriu, kioske, restaurante no ótel na’in-sira ho vontade tomak bele partisipa iha semináriu ne’e, hodi rona papél Diresaun Nasionál Regulasaun Komersiál no Protesaun Konsumidór nian.
Nia fundamenta, baze legál MTKI nian haktuir iha dekretu-lei 66/2020, liuhosi alterasaun dahuluk hosi dekretu-lei númeru 12/2019, fó kompeténsia ba Diresaun Nasionál Regulasaun Komersiál no Protesaun Konsumidór ho nia misaun sira mak kolabora ho Autoridade Inspesaun Fiskalizasaun Atividade Ekonómika Sanitária no Alimentár (AIFAESA) iha ámbitu atividade inspesaun no fiskalizasaun hodi promove defeza ba protesaun konsumidór sira.
Nune’e mós asegura mós intervensaun presu merkadória, regula mós kona-bá merkadu no ikus liu maka kolabora ho entidade relevante sira hodi hala’o serbisu, liuliu ba defeza diretu konsumidór.
“Tan ne’e liuhosi divulgasaun ne’e, ha’u husu operadór ekonómiku sira atu hala’o negósiu presiza prienxe rekizitu no buka hatene hodi kumpri lei ne’ebé prevalese ba Estadu, nafatin halo kontrolu ba atividade ekonómika, nune’e diresaun tenta aprosima mós ho operadór ekonómiku sira oinsá komrimenta lejizlasaun sira-ne’ebé iha, hodi hala’o negósiu ho seguru,” nia ko’alia iha abertura divulagasaun hala’o iha salaun Alfándega, Oé-Cusse.
Diretór nasionál ne’e, apela sidadaun ne’ebé de’it hakarak hala’o atividade ekonómika tenke iha obrigasaun no responsabilidade hodi respeita ba lejizlasaun sira-ne’ebé maka Estadu Timor-Leste kria ona.
Purtantu, semináriu divulgasaun ne’e abertura hosi Adjuntu Prezidente Autoridade RAEOA, Maximiano Neno, konsidera divulgasaun ne’e importante ba setór privadu sira iha Oé-Cusse atu iha koñesimentu.
“Semináriu ne’e importante tebes, atubele dezamina informasaun kona-bá regulamentu sira-ne’ebé mak Governu halo ona, ha’u esperu liuhosi atividade ne’e sei hakle’an koñesimentu ba setór privadu nu’udar operadór ekonomia sira atu aplika iha terrenu, hala’o negósiu tenke abitua-aan liuhosi prosesu legál sira, sé lae enfrenta problema Governu aplika multa no sansaun,” nia katak.
Nia espera liuhosi divulgasaun ne’e operadór ekonómiku sira, emprezáriu, otél no restaurante sira presiza rona no intende tanba Oé-Cusse presiza iha koñesimentu ba regulamentu sira.
Jornalista: Abílio Elo Nini
Editór: Evaristo Soares Martins
