COVALIMA, 05 Outubru 2022 (TATOLI) – Administradór Munisípiu Covalima, Francisco de Andrade observa direta prosesu servisu kompañia Verde Caisahe ne’ebé konstrui edifísiu Administradór munisípiu Covalima.
“ Ha’u mai iha ne’e atu haree konstrusaun edifísiu administradór, tanba bazea ba kontratu finaliza iha fulan jullu tinan 2022, maibé konstrusaun seidauk finaliza ho razaun inundasaun no prosesu eleisaun Prezidénsial,” Francisco de Andrade dehan ba jornalista iha Santa-Rosa Covalima, kuarta ne’e.
Nia isplika, tuir kontratu konstrusaun kompañia finaliza iha jullu tinan 2022, maibé diretór kompañia mós foin lalalis hato’o ona karta justifikasaun no halo estensaun ba kontratu aumenta tan fulan rua. Ho nune’e konstrusaun sei finaliza iha 31 novembru ne’e.
“Ho estensaun kontratu durante fulan rua tan maske kompañia seidauk finaliza maibé ita haree fali konstrusaun komesa iha ona mudansa,” nia informa.
Konstruisaun edifísiu Administradór Covalima ho nia medida 30,70× 22,50 ne’ebé konstrui hosi kompañia Verde Caisahe Unipesoál LDA.
Orsamentu konstruisaun edifísiu Administradór Munisípiu Covalima ne’e prevee iha Orsamentu Jerál Estadu (OJE) tinan 2021 ho total $262,570.
Antes ne’e iha loron 15 setembru 2022 , Diretór PDIM Afonso Nugueira Nahak mós observa ona konstrusaun edifísiu no progresu fiziku atinje ona 63,66%
Jornalista : Celestina Teles
Editóra : Armandina Moniz
