DILI, 05 outubru 2022 (TATOLI)–Ministru Ensinu Superior Siénsia no Kultura (MESSK), Longuinhos dos Santos, hateten, timor-oan ne’ebé dedika-an nu’udar profesór hodi hanorin estudante iha nível pre-eskolár to’o ensinu superiór ne’e konsidera manorin ne’ebé iha kualidade atu lori edukasaun Timor-Leste ba futuru ida di’ak liu.
“Ha’u husu ba imi hotu atu nafatin motiva imi-nia an nu’udar profesór ne’ebé iha kapasidade no kualidade, atu nune’e bele fó nafatin ensinu di’ak ba kualidade edukasaun iha ita-nia rai doben Timor-Leste,” Ministru dehan iha Palásiu Governu, relasiona ho loron mundiál ba profesór sira, kuarta ne’e.
Notísia relevante: MESSK ezekuta ona 58,05% hosi OJE 2022
Tuir governante ne’e, bainhira ko’alia kona-ba kualidade profesór ein jerál nu’udar norma definitiva ida tanba iha instituisaun ensinu superiór nia laran kualidade edukasaun ne’e presiza sukat hosi indikadór balun atubele hatene kualidade edukasaun iha nível ensinu superiór to’o iha ne’ebé.
“Sasukat sira ne’e rasik haree hosi dezenvolvimentu infraestrutura iha instituisaun ensinu superiór, kapasitasaun rekursu umanu profesór ka dosente, dezenvolvimentu kurríkulu no jestaun atu jere instituisaun rasik,” nia akresenta.
Aleinde ne’e, nia mós nota katak indikadór sira ne’e maka sei sai hanesan pasu importante no prioridade atubele garante kualidade instituisaun ensinu superiór nia laran. Kuandu laiha indikadór sira ne’e difísil instituisaun ida bele hatene ninia progresu rasik, enkuantu kapasitasaun rekursu umanu ne’e buat importante liu.
“Ho nune’e, nu’udar membru VIII Governu Konstitusionál ne’ebé hanesan Ministru Ensinu Superior Siénsia no Kultura, hakarak hato’o parabéns ba profesór sira, hahú hosi pre-eskolár mai to’o iha ensinu superiór ba loron mundiál profesór sira-nia. Dedikasaun ne’ebé profesór sira oferese ne’e nu’udar rekursu umanu ida atu garante edukasaun Timor-Leste ba futuru ida di’ak liu hodi bele prepara-an atu kompete ho nasaun sira seluk,” nia tenik.
Jornalista : Tomé Amado
Editora : Julia Chatarina
