DILI, 14 outubru 2022 (TATOLI)–Estudante na’in-1000 hosi fakuldade Direitu umanu Universidade Nasionál Timor-Lorosa’e (UNTL) termina ona kursu introdusaun ba Direitu umanu iha Sudeste Aziátiku ne’ebé sai hanesan matéria disiplina transversál ba tinan akadémiku 2021-2022.
Estudante fakuldade Direitu umanu ne’ebé finaliza kursu ho nota a’as, Fazia Maria Pinto Ferreira, konsidera, direitu umanu kestaun ne’ebé universál ne’ebé loke ba ema hotu la ho diskriminasaun ba rasa etnia, lian seksu no relijiaun.
“Ha’u nu’udar estudante UNTL, kontente tanba bele hetan ona kurríkulu ne’e, entaun ha’u sei hakarak apreende liután iha futuru,” Estudante hateten iha kampus sentrál, sesta ne’e.
Tuir nota imprensa ne’ebé Agência Tatoli asesu hosi http://www.gchumanrights.org/hrc-untl, hateten katak kursu ne’e implementa ba dalahuluk nu’udar edisaun pilotu iha fakuldade lima hosi sia. Aleinde envolve departamentu 13, dosente na’in-21 no ho inskrisaun hosi estudante na’in-1.130, kompostu hosi mane 532 no feto 598, ne’ebé hosi prosesu ne’e rasik kuaze 85% hosi totál estudante liu ezame ho susesu.
Notísia relevante: MEJD no UNTL kontinua hametin kooperasaun iha área formasaun profesór
Nune’e mós, Dosente UNTL, Bernardo Idalina Leto, haktuir, formandu ida iha Sentru ne’ebé sai hanesan formadór ba direitu umanu, dehan hatama kursu direitu umanu iha UNTL nia kurríkulu nu’udar matéria obrigatóriu.
“Ba estudante hotu, permite hakle’an sira-nia koñesimentu kona-ba direitu umanu hanesan meta ne’ebé alkansa ona to’o agora. Ida-ne’e nu’udar garantia ba sira hodi defende valór direitu umanu durante iha sira-nia moris,” nia akresenta.
Durante kursu ne’e, estudante sira apreende no fahe hanoin kona-ba direitu umanu nia istória no fundamentu sira, mekanizmu protesaun internasionál no rejionál, direitu hosi grupu espesífiku sira hanesan kestaun temátika sira seluk ne’ebé relevante liu iha nível lokál.
Hamutuk Campus Global ba Direitu Umanu no programa rejionál hosi GC Ázia-Pasífiku, ho baze iha Universidade Mahidol (Bangkok), maka dezenvolve experiénsia no ferramenta sita atu implementa kursu ne’e.
Prosesu ne’e envolve mós kooperasaun ho parseiru estratéjiku sira seluk hanesan Centro Nacional Chega (CNC), Provedoria ba Direitu Umanu no Justisa (PDHJ, sigla portugés), Rede Universitária ASEAN (AUN-HRE) no konsultasaun ho OSS lokál iha Timor-Leste atu prepara estudu kazu no ezemplu sira.
Kursu ne’e sei kontinua fali iha tinan oin ba fakuldade UNTL hotu liuhosi ekipa ho dosente na’in-40, ne’ebé inklui grupu formandu daruak hosi Sentru Direitu Umanu nian ne’ebé ramata ho susesu formasaun ba formadór ne’ebé Sentru ne’e organiza iha tinan 2022.
Sentru Direitu Umanu UNTL hamosu ho projetu kapasitasaun ne’ebé implementa hamutuk kampus Globál ba Direitu Umanu, ho apoiu hosi Uniaun Europeia dezde 2019. Projetu ne’e nia objetivu mak dezenvolve edukasaun ba direitu umanu iha UNTL, no daudaun hala’o ninia faze akompañamentu hodi halo konsolidasaun graduál ona. Iha dezembru 2022 mak planu atu entrega sentru ba Universidade Nasionál.
Jornalista : Tomé Amado
Editora : Julia Chatarina
