COVALIMA, 18 outubru 2022 (TATOLI)–Administradór Munisípiu Covalima Francisco de Andrade informa, iha proposta Orsamentu Jerál Estadu tinan fiskál 2023 ne’e munisípiu Covalima propoin orsamentu $5.738,515 hodi finansia programa sira iha Covalima.
“Tetu Orsamentu Jerál Estadu tinan fiskal 2023 munisípiu Covalima propoin $5.738,515 hosi orsamentu sira-ne’e ita agora uza sistema foun no kona-ba prióridade orsamentu ho nia kategória orsamentu ha’u la dekór,” Administradór munisípiu Covalima, Francisco de Andrade, informa ba Agência Tatoli, iha Administrasaun Munisípiu Covalima (AMC), iha Sukaer Laran, tersa ne’e.
OJE 2023 mós fó prióridade ba projetu ne’ebé hato’o ona tinan 2022 ne’ebé la pasa, maske la pasa maibé aprezenta nafatin iha tinan 2023 mós la pasa nafatin tanba la tama iha dalan ba futuru munisipal nian.
Iha tinan 2021, Covalima iha de’it projetu rua mak hanesan konstrusaun rezidénsia Administradór Munisípiu Covalima no konstrusaun edifisiu administradór postu administrativu Maucatar.
Bazea ba livru 3B ne’ebé Agência Tatoli asesu OJE tinan fiskál 2023, Covalima propoin $5.738,515 ne’ebé fó prioridade ba programa 11 mak hanesan estrada no ponte $67,709
Dezenvolvimentu rurál no urbana $78,972, seguransa nasionál $105,079, asesu justisa $54,368, boa-Governasaun jestaun instituisionál $2,852,631, agrikultura $528,958.
Agua no Saneamentu $165,441, saúde $244,959, edukasaun no formasaun $1,446,477, igualdade jeneru no inkluzaun sosiál $136,300 no Turizmu $57,621.
Jornalista : Celestina Teles
Editór : Cancio Ximenes
