DILI, 23 outubru 2022 (TATOLI)—Ekipa konjunta liuhosi operasaun iha sesta (20/10) kalan, halo ona detensaun ba Diretór ajénsia viajen, New Generation ho inisiál FFX, iha residénsia Taibesi, tanba deskonfia envolve kazu tráfiku umanu.
Ekipa konjunta ne’ebé halo operasaun kompostu hosi PNSIK, Servisu Informasaun Polísia (SIP) Servisu Informasaun Militár (SIM/J2), no Servisu Nasionál Intelijénsia (SIN), hodi buka tuir ajénsia viajen sira iha Dili laran ne’ebé durante ne’e fasilita timor-oan bá serbisu iha rai-li’ur.
“Ekipa halo ona detensaun fragante delitu ba supeitu FFX iha sesta foin lalais ne’e, hafoin halo prosesu identifikasaun no investigasaun. Daudaun suspeitu iha sela Polísia Nasionál Servisu Investigasaun Kriminál (PNSIK) Komandu Jerál Polísia Nasionál Timor-Leste (PNTL) Caicoli,” Komandante PNSIK, Superintendente Xefe, Jorge Monteiro, informa ba Agência Tatoli, via telefónika, domingu ne’e.
Notísia relevante: Ajénsia New Generation prontu reembolsa osan billete ba Sofia Amaral
Nune’e, tuir prosesu normál, suspeitu tenke kumpre detensaun iha oras 72 nia laran, molok submete ba primeiru interregotóriu iha Tribunál Distritál Dili (TDD).
“Primeiru interregatóri ba suspeitu rasik sei hala’o iha lorokraik ne’e iha Tribunál Distritál Dili ,” Komandante PNSIK hateten.
Aleinde ne’e, ekipa konjunta asegura mós timor-oan 14 ne’ebé sai vítima ba ajénsia New Generation, ne’ebé antes ne’e kada ema hatama osan $3.410 hodi bele desloka bá Portugal, maibé la konsege to’o fatin destinasaun no to’o de’it iha Bali, Indonézia.
“Ita prosesa sidadaun sira no halo identifikasaun ba sira ho estatutu nu’udar vítima ba ajénsia New Generation, tanba atu fasilita sira atu bá portugál,” nia relata.
Jornalista : Natalino Costa
Editora : Julia Chatarina
