DILI, 30 outubru 2022 (TATOLI)— Prezidente Repúblika (PR), José Ramos Horta, ho delegasaun, domingu (30/10/22) ne’e, to’o iha Portugál.
Tuir komunikadu imprensa ne’ebé Agéncia TATOLI katak, Xefe Estadu ho delegasaun to’o iha aeroportu internasionál Portugál ho aviaun Emirates EK-191, oras 11:37 Portugál nian.
Primeadu Nobel da Páz, Ramos Horta, tuun hosi aviaun simu direta hosi Xefe Protokolu Estadu Portugál Embaixadora, Clara Nunes dos Santos, Embaixadora Timor-Leste bá Portugál, Isabel Ferreira, Embaixadora Portugál ba Timor-Leste, Manuela Barios, Adido Defeza Timor-Leste ba Portugál, Koronel, João Pedro da Silva, Adidu Edukasaun, Natalino Ximenes no funsionáriu embaixada nian hodi tara tais no entrega ai-funan nu’udar sinál agradesimentu.
Hosi aeroportu Prezidente Repúblika ho delegasaun kontinua ba Otél Pestana Palace Lisboa, hodi kontinua enkontru ho embaixadora no Ministra Negosiu Estranjeru no Kooperasaun (MNEK), Adalijiza Albertina Xavier Reis Magno hodi atualiza ajenda vizita nian.
Iha oras 15:30, PR kontinua hala’o kedas enkontru ho delegasaun emprezáriu jigante hosi Itália.
Tuir ajenda, iha loron 31 outubru, Horta sei hala’o vizita bá Palásiu Prezidente Repúblika Portugál sei simu ho onra militar no entrega aifunan agradesimentu hodi kontinua hala’o reniaun bilaterál ho nia omólogu Prezidente Portugál, Marcelo Rebelo de Sousa no membru governu sira.
Iha enkontru entre Xefe Estadu rua, sei akompaña hosi Ministra MNEK, Embaixadora Timor-Leste ba Lisboa, Asesór Koordenador Internasionál, Dionisio Babo Soares, Asesór Prinsipal, Nelson Santos, Ivo Jorge Valente, Milena S. Abrantes, João Pereira, Konseleira Madalena Filipe, Angela Maria Sarmento, Roger Soares.
Hafoin hasoru PR Portugál, Horta sei hala’o enkontru ho Primeiru Ministru Portugál, António Costa no kontinua vizita partisipa serimónia sesaun solene iha edifísiu CPLP.
Tuir ajenda Xefe Estadu sei hala’o reniaun ho Prezidente Assembleia Repúblika Portugál,
Augusto Santos Silva iha salaun enkontru Assembleia da Repúblika São Bento.
Iha oportunidade ne’e, PR Horta sei kontinua hala’o enkontru ho komunidade timoroan sira ne’ebé hela no hala’o estudu iha Portugál.
Xefe Estadu sei partisipa mos abertura Web summit 2022 ka feira internasionál Lisboa (FIL), vizita paviliaun polísia munisipa Lisboa, vizita ba sede g7+ hodi hala’o enkontru ho ekipa sira.
Durante iha Portugál, PR Horta sei hetan entrevista direita hosi Televizaun CMTV, no hetan entrevista esklusivu hosi revista “Politic Internasional”.
Xefe Estadu sei hala’o mós enkontru ho grupu emprezáriu Portugál hodi rona sira nia hanoin no fahe esprensia Timor-Leste nian, no PR sei kontinua hala’o reniaun ho Prezidente Kosovo, Vjasa Osmani-Sadriu no ajenda seluk tan.
Jornalista: Nelson de Sousa
Editór : Florencio Miranda Ximenes
