iklan

NASIONÁL, OPINIAUN

ASSEPPOL preokupa ekilibriu poder entre sosiedade no Estadu

ASSEPPOL preokupa ekilibriu poder entre sosiedade no Estadu

Portavós no Diretór Ezekutivu Associação dos Ex-Prisioneiros Políticos de Timor-Leste (ASSEPOL), Martinho Pereira. Imajen Tatoli/Nelia Fernandes.

DILI, 22 novembru 2022 (TATOLI)—Associação dos Ex-Prisioneiros Políticos de Timor-Leste (ASSEPOL) fó solidariedade ba manifestasaun Aliansa Maubere Nasionál (AMN) ne’ebé halo manifestasaun hodi kontra Parlamentu Nasionál (PN) sosa karreta Prado no laptop ba deputadu sira.

Portavós no Diretór Ezekutivu Associação dos Ex-Prisioneiros Políticos de Timor-Leste (ASSEPOL), Martinho Pereira, hateten ASSEPOL preokupa kona-ba ekilibriu iha poder entre sosiedade no Estadu liu-liu kontrolu no supervizaun hosi sosiedade ba lala’ok elite nian.

“ASSEPPOL preokupa kona-ba ekilibriu iha poder entre sosiedade no Estadu, liu-liu kontrolu no supervizaun hosi sosiedade ba lala’ok elite ne’ebé kaer orgaun Estadu nian. Iha sentidu ida-ne’e, ASSEPPOL hato’o nia solidariedade no apoiu ba manifestasaun ne’ebé la’o dadauk no apela ba manifestante sira atu ko’alia livre nafatin tuir trámite legál sira-ne’ ebé vigora iha RDTL,” Martinho Pereira hateten liuhosi konferensia imprensa ne’ebé halo iha salaun CNC, antigu komarka, Balide, tersa ne’e.

Nune’e, ASSEPPOL kondena atuasaun Polísia Nasionál Timor-Leste (PNTL) ne’ebé halo detensaun ba manifestante sira, tanba ida-ne’e halo lisaun ba sidadaun sira-ne’ebé hato’o nia espresaun polítika tolerável de’it iha rejime autoritáriu sira.

“Tanba, PNTL nia tarefa primordiál tuir lei mak atu garante ordem públika, la’ ós atu bandu ka halo dispersaun ba manifestasaun pasífika,” nia dehan.

ASSEPPOL mós husu ba PNTL atu liberta joven manifestante sira-ne’e imediatamete no sein kondisaun tabva Estadu demokrátiku labele iha detidu no detensaun bá sidadaun timorense ida tanba esspresa nia hanoin polítika, tanba ASSEPPOL konsidera nu’udár um acto de traição ba asswa’in no martir libertasaun nasional nia prinsipiu no ideal ‘Sosiedade Livre e Democrático’.

ASSEPPOL apela ba Magnífiku Reitór Universidade Nasional Timor Lorosa’e (UNTL) atu defende autonomia akadémika universidade nian, liuhosi garante espasu ba estudante sira hodi manifesta sira-nia hanoin polítika no labele husik autoridade seguransa Estadu nian halo invazaun ba resintu universidade nian atu halo apreensaun ba estudante sira.

Antigu Prizioneiru Polítikus Timor-Leste ne’ebé hamahon-an iha ASSEPPOL, akompaña ho atensaun evolusaun ezersísiu síviku hosi joven universitériu sira, ne’ebé halo manifestasaun kontra Parlamentu Nasionál atu sosa karreta Prado no laptop ba deputadu sira.

ASSEPPOL la’ós promove de’it sosiedade livre maibé mós iha misaun no vizaun atu batalla hodi labele iha tan prisoneiru polítiku iha Timor-Leste, livre no independente tanba de’it hato’o nia opiniaun kontráriu ho ukun na’in sira kona-ba asuntu interrese públiku.

Jornalista : Nelia Fernandes

Editór       : Cancio Ximenes

iklan
iklan

Leave a Reply

iklan
error: Content is protected !!