VIQUEQUE, 25 novembru 2022 (TATOLI)–Autoridade munisípiu Viqueque, Januário Soares ‘Bolly’, informa, diretór sira hosi administrasaun munisípiu Viqueque, sesta ne’e, hahú diskute kona-ba Planu Investimentu Munisipál (PIM) ba tinan 2024.
“Molok tinan 2022 ramata, refere ba kalendáriu elaborasaun PIM 2024 nian, ho objetivu sei define planeamentu tuir menu indikativu sira liuhosi setór hotu iha munisípiu rasik ne’ebé sai hanesan prioridade iha tinan 2024,” Autoridade munisipál hateten liuhosi ninia diskursu abertura diskusaun PIM, iha salaun administrasaun, Beloi.
Konsellu sei diskute prosesu elaborasaun PIM 2024, tanba kada munisípiu sira tenke hahú ona prosesu elaborasaun Planeamentu Dezenvolvimentu Integradu Munisipál (PDIM) ba tinan 2024 nian.
Notísia relevante: Autoridade munisípiu avalia progresu projetu rua iha Viqueque
Knaar PDIM bazeia ba artigu 13 no dekretu-lei númeru 54/2020, nu’udar segunda alterasaun ba dekretu-lei númeru 3/2016, 16 marsu kona-ba estatutu administrasaun munisipál ka autoridade munisipál inklui grupu tékniku interministeriál kona-ba desentralizasaun administrativa.
“Ita hahú prosesu elaborasaun hosi pasu identifikasaun prioridade iha nível suku no postu administrativu sira liuhosi métodu paralizmu, hafoin halo selesaun iha suku atu aprezenta ba postu administrativu hodi tais sai prioridade ne’ebé korresponde ba situasaun sosiál atuál iha komunidade nia le’et,” nia akresenta.
Nune’e, planu sira sei aprezenta ba Konsellu Koordenasaun Munisipál atu deside no halo peramentu matrix atu define setór prioridade iha munisípiu Viqueque.
Atividade ne’e partisipa hosi membru Konsellu Koordenasaun Munisipál, membru Asembleia postu administrativu, Administradór postu lima inklui Diretór PDIM no Diretór planeamentu.
Jornalista : Vitorino Lopes da Costa
Editora : Julia Chatarina
