OÉ-CUSSE, 29 dezembru 2022 (TATOLI)–Diretór Diresaun Rejionál Infraestrutura RAEOA, Kandidu dos Reis Amaral, hateten empreza internasionál PT.Waskita Karya Tbk, halo ona identifikasaun topografia ba reabilitasaun estrada hosi sub-rejiaun Pante Makasar liga ba sub-rejiaun Nítibe.
Projetu melloramentu no reabilitasaun ne’e hanesan faze dahuluk hosi ponte Noefefan suku Lifau, sub-rejiaun Pante Makasar to’o Oénunu suku Suni-Ufe, sub-rejiaun Nítibe ho distánsia kilómetru 20.
“Projetu estrada nasionál kontinuasaun hosi Ponte Noefefan ba to’o Oénunu nia progresu to’o pursentu lima, agora daudaun projetu ne’e tama ona iha prosesu identifikasaun servisu topografia nian, maibé ita haree iha ne’ebá empreza komesa halo ona ateru metru 300-resin”, Kandidu Amaral dehan ba Tatoli iha Oé-Cusse, kinta ne’e.
Nia hatutan, servisu ne’ebé empreza halo laiha difikuldade, tanba iha parte servisu terras no propriedade, diresaun agrikultura halo ona aprosimasaun karik afeta ba patrimóniu komunidade nian, hanesan lutu, rate no plantasaun, fasilidade públiku liu-liu eletrisidade no bee-moos.
“Ida-ne’e depende fali ba servisu topografia iha finál dezeñu aprezenta ba ita, ida-ne’ebé makai ita aseita no aprova, ida-ne’e maka sei konsidera hanesan dalan ba servisu terras no propriedade, agrikultura no servisu estrada hodi bele ba halo re-identifikasaun karik afeta duni,” nia afirma.
Konstrusaun hosi suku Cunha, sub-rejiaun Pante Makasar liga suku Bobometo, sub-rejiaun Oésilo, daudaun ne’e iha hela prosesu aprovizionamentu hodi rekonkursu tanba empreza seluk hato’o hela karta reklamasaun.
Empreza internasionál PT. Waskita Karya, Tbk ne’ebé kaer projetu ne’e ho valór kontratu millaun $23. Autoridade RAEOA prevee ira Orsamentu Jerál Estadu (OJE) 2022 ho durasaun servisu durante fulan 18.
Notísia relevante: Autoridade adia hatuur fatuk dahuluk projetu estrada nasionál Pante Makasar-Oésilo
Jornalista : Abílio Elo Nini
Editora : Rita Almeida
