DILI, 11 janeiru 2023 (TATOLI)—Prezidente Konsellu Administrasaun Autoridade Nasionál Água no Saneamentu, Institutu Públiku (ANAS, I.P), Domingos Pinto, hateten, daudaun ne’e sira-nia parte seidauk iha kompeténsia atu regula ema fura bee ilegál tanba laiha lei própriu atu regula.
“Ko’alia kona-ba ema kontinua fura bee iha Dili no territóriu laran, ida-ne’e nia impaktu boot ba depózitu bee rai-okos, maibé daudaun ita laiha kompeténsia atu regula tanba laiha lei ruma ne’ebé ita kaer,” Domingos Pinto, relata ba Agência Tatoli, iha ninia knaar fatin, Caicoli, kuarta ne’e.
ANAS, I.P halo esforsu no konsege prodús dekretu-lei ba jestaun rekursu bee, maibé lei ne’e iha maiu 2022 aprezenta ba Governu la pasa ho razaun iha artigu ida kona-ba lisensiamentu rekursu bee ne’e iha ona kompeténsia ida iha munisípiu ne’ebé aprova ona hosi Parlamentu Nasionál.
“Agora ANAS, I.P ba ho dekreru-lei, entaun lei ne’e boot liu dekretu-lei, maibé ANAS, I.P haree hosi irárkia kona-ba jestaun rekursu bee iha Integrated Water Resources Management ne’e sempre ko’alia katak jestaun rekursu bee ne’e tenke iha nível nasionál mak haree asuntu ne’e,” nia akresenta.
Notísia relevante: Prosesu dada bee-moos hosi Railaco iha faze diskusaun ezbosu finál
Agora ANAS, I.P koordena ona ho ministériu relevante sira atu husu sira-nia apoiu, nune’e lei ne’e bele pasa tanba bainhira la pasa, perfurasaun bee iha Dili laran kontinua la’o no bee suli estraga.
“Ida-ne’e fó impaktu ba bee rai-okos tanba hasai hotu bee maran no tasi been sei tama mai. Ida-ne’e sei sai problema boot. Ami hakarak lalais iha lei atu proteje utilizasaun rekursu bee, maibé antes lei ne’e iha, husu ba públiku labele kontinua fura bee tanba ninia impaktu boot ba depózitu bee iha rai okos Dili no impaktu negativu mak siénsia rekursu bee iha rai-okos ne’ebé depózitu ne’e sei menus,” Domingos Pinto esplika.
Nia dehan, bainhira komunidade hakarak fura bee tenke koordena ho parte autoridade bee atu haree potensialidade fura, nune’e bainhira iha lei ruma bele halo jestaun, tanba bee rai-okos depende ba udan.
Jornalista : Arminda Fonseca
Editora : Julia Chatarina
