VIQUEQUE, 06 janeiru 2023 (TATOLI)— Diretór Serbisu Obra Públiku, munisípiu Viqueque, Mario do Rego, informa semana oin, empreza China Railway International Group Co Ltd, finaliza ona konstrusaun ponte Buanurak, nune’e komunidade iha munisípiu ne’e bele utuliza hodi halo movimentu.
“Semana oin, liuliu iha loron 12 fevereiru ba leten ne’e, kompañia finaliza ona no ita bele uza karreta sira ne’ebé todan hodi halai iha ponte nian-leten,” hateten Diretór Mario ba Agência Tatoli, iha edífisiu administrasaun munisípiu Viqueque, segunda ne’e.
Notísia relevante:Tékniku garante públiku bele halo movimentu iha ponte Buanurak iha fevereiru
Ponte foun iha área Buanurak ne’e lokaliza iha baliza entre postu administrativu Ossu no postu administrativu Viqueque-vila, munisípiu Viqueque.
Kompañia ne’ebé konstrui ponte ne’e mak China Railway International Group Co Ltd, hamutuk ho China Overseas Engineering Group Co, Ltd, ne’ebé kustu ba infraestrutura ne’e tama ba pakote projetu konstrusaun estrada nasionál hosi munisípiu Baucau ba Viqueque, iha lot rua hosi Baucau to’o Venilale no hosi Venilale to’o Viqueque ho kustu $23.853.175,70.
“Konstrusaun mós hotu ona, agora daudaun ita-nia traballadór sira kontinua serbisu hodi finaliza buat hotu no iha ona rezultadu teste ne’ebé hatudu kualidade di’ak,” nia afirma.
Ponte Buanurak tuan ne’ebé kotu iha loron 28 novembru 2022, difikulta ba transporte públiku inklui ema la’o ai- sira ne’ebé halo movimentu bá-mai iha munisípiu Viqueque.
Notísia relevante:Empreza responsável hahú fui ona semente ba ponte Buanurak Viqueque
Jornalista: Vitorino Lopes da Costa
Editór : Florencio Miranda Ximenes
