DILI, 11 fevereiru 2023(TATOLI)- Primeiru-Ministru (PM), Taur Matan Ruak, ohin hala’o vizita ofisiál ba Repúblika Indonézia, hodi diskute kona-bá relasaun no kooperasaun bilaterál entre nasaun rua.
”Durante estadia iha Indonézia hosi loron 11 to’o 14 fevereiru 2023, Xefe Governu Timor Leste sei hasoru malu ho Prezidente Repúblika Indonézia, Joko Widodo, hodi diskute kona-ba relasaun no kooperasaun bilaterál País rua nian,’ nota imprensa ne’ebé Agência TATOLI.
Aproveita vizita refere, Xefe Governu mós hakarak hato’o profundu agradesimentu pesoál ba Prezidente Jokowi no Governu Indonézia nia apoiu inkondisionál ba Timor-Leste hodi ohin Timor-Leste sai ona membru ASEAN nu’udar observadór.
Iha vizita ne’e, Xefe Governu hetan akompañamentu hosi Ministra Negósiu Estranjeiru no Kooperasaun, Adaljiza Magno.
Hafoin termina vizita Indonézia, Xefe Governu sei kontinua nia viajen partikulár ba Singapura molok fila -ali mai Timor-Leste.
Jornalista : Felicidade Ximenes
Editór: Evaristo Soares Martins
