DILI, 13 fevereiru 2023 (TATOLI)–Diretór Servisu Edukasaun Munisípiu Bobonaro (DSEMB), Crispim Lopez, hateten estudante mellór klasifikadu iha Bobonaro ne’ebé tama iha lista atu hetan prémiu bolsa méritu hamutuk 1.336 maibé foin mak estudante na’in-531mak asesu ona konta bankária.
“Ita submete ona dadus provizória rekapitulasaun konta bankária sira-nian mai Ministériu Edukasaun tama ona faze daruak. Agora, ita sei hein tan faze rekapitulasaun tuir mai atu submete tan ba Ministériu Edukasaun,” Crispim Lopez hateten ba Agência Tatoli liuhosi telefónika, segunda ne’e.
Nia dehan, dadus rekapitulasaun konta bankária ne’ebé sira submete ona mai Ministériu Edukasaun hamutuk 531 hosi faze dahuluk sira submete uluk 231, hafoin sira submete tan dadus segundu hamutuk 300, entaun agora sei falta estudante 832 mak sei iha hela prosesu tratamentu konta bankária.
Tuir nia, prosesu atu trata konta bankária iha Bobonaro mak iha difikuldade buat balun ne’ebé dada tempu demais.
Banku Nasional Komérsiu Timor-Leste (BNCTL) halo limitasaun tempu atu atende kliente sira, tanba loron ida BNCTL bele atende de’it kliente to’o de’it ema na’in-50 no ida-ne’e mós la’ós atu fó prioridade ba estudante de’it sira-nia atendimentu ba prosesu konta bankária ne’e loke ba públiku.
Diretór ne’e konsidera maske BNCTL halo limitasaun ba kliente sira atu loke konta bankária, iha mós obstákulu seluk ne’ebé mak Edukasaun Bobonaro enfrenta mak inan-aman balun laiha dokumentu kompletu, sira tenke ba trata fali Billete Identidade no sertidaun RDTL no ida-ne’e mak kontinua dada prosesu ne’e to’o agora mós seidauk rezolve hotu.
Maibé, nia iha esperansa molok fulan ida-ne’e ramata, metade estudante ne’ebé seidauk hetan sira-nia konta bankária iha BNCTL ne’e bele asesu hotu ona, atu nune’e BNCTL bele halo ona transferénsia osan ba ida-idak nia konta bankária.
Entretantu, hosi totál estudante iha territóriu nasionál ne’ebé identifikadu ona atu hetan prémiu bolsa méritu ne’e hamutuk 13.517, maibé to’o mistériu seidauk informa totál estudante hira mak hetan ona konta bankária, atu nune’e bele tama ona ba prosesu transferénsia osan ba sira-nia konta.
Jornalista : Tomé Amado
Editór : Cancio Ximenes
