iklan

Uncategorized

Governu foun bele kontinu konstrui UNP ba populasaun sira

Governu foun bele kontinu konstrui UNP ba populasaun sira

Ministru Administrasaun Estatál, Miguel Pereira de Carvalho. Imajen/ Tatoli

DILI, 13 fevereiru 2023 (TATOLI)—Ministru Administrasaun Estatál (MAE), Miguel Pereira de Carvalho, hateten hein katak mandatu VIII Governu Konstitusionál nian termina iha tinan ne’e, governasaun foun sei bele kontinua konstrui Uma Naroman ba Povu (UNP) ba povu territóriu nasionál.

“Ha’u hetan konvite hosi xefe suku Camea hodi lansa ba Uma Naroman ba Povu plus A (UNP+ A) iha Camea no ita aloka osan uma kuaze 80 iha territóri Dili mak postu Cristo Rei hetan uma 20, nune’e suku Camea hetan uma tolu (3). Entaun ha’u-nia esperansa katak governasaun tuir mai kontinua halo uma ba ita-nia populasaun sira,” nia dehan,” MAE hateten.

Governante ne’e dehan família kuaze rihun 200 mak ladún iha kondisaun no iha mandatu VIII Governu Konstitusionál só bele halo de’it mak ba família rihun 10, maibé iha suku Camea iha benefisiáriu na’in-tolu ba UNP tipu A no tipu B hamutuk 37.

Benefisiáriu ba Uma Naroman ba Povu ho tipu B ne’e ba aldeia Buburlau, suku Camea, postu administrativu Cristo Rei, Francisco Tomas, agradese ba Governu tanba bele tulun ona sira hodi fahe materiál hanesan zinku ba sira hodi bele hadi’a sira-nia uma.

“Ha’u sente kontente tanba liuhosi Governu nia ajuda ne’e bele tulun ona ami hodi ohin ami hetan zinku no ho ida-ne’e ha’u hakarak agradese ba Estadu no Governu ida-ne’e, maibé karik sei iha tan planu atu ajuda husu haree mós ba maluk seluk ne’ebé seidauk hetan,” nia dehan.

Hafoin lansamentu iha Camea, Governante ne’e kontinua halo lansamentu iha suku Bairru Pite, postu administrativu Dom Aleixo, munisípiu Dili, hodi lansa mós UNP tipu A no tipu B.

Benefisiáriu kategoria A, Feliciano da Lúz, husu Governu tau-matan mós ba povu seluk ne’ebé mak seidauk hetan direitu ba UNP ne’e.

“Sente kontente no agradese ba Governu maibé husu nafatin ba Governu atu tau-matan mós ba sira seluk ne’ebé seidauk hetan uma,” nia rekomenda.

Jornalista : Osória Marques

Editór       : Cancio Ximenes

iklan
iklan

Leave a Reply

iklan
error: Content is protected !!