OÉ-CUSSE 21 fevereiru 2023 (TATOLI) – Autoridade Rejiaun Administrativa Espesiál Oé-Cusse Ambeno (RAEOA) liuhosi Sekretáriu Rejionál Asuntu Agríkultura, serbisu hamutuk ho Sekretáriu Rejionál ba Asuntu Administrasaun, kontinua implementa dekretu lei tékniku pekuária nú.12/2014 kona-ba retrisaun movimentu tráfiku animál iha área urbana, hodi limita sirkulasaun movimentu animál la’o livre iha área urbana.
Sekretáriu Rejionál Asuntu Agrikultura, José Eta, esplika atu regula no limita sirkulasaun animál sira iha área urbana liuliu iha suku (5), suku Nipani, Costa, Lifau, Cunha ho Lalisuk pertense sub-rejiaun Pante Makasar, autoridade aplika dekretu lei tékniku pekuária nian nú.12/2014 kona-ba retrisaun movimentu tráfiku animál iha área urbana, bandu ema atu labele husik animál la’o livre iha sidade laran
“Ita agora mantein ida-ne’e, atu limita movimentasaun animál iha área urbana, tanba Governu liuhosi Autoridade RAEOA esforsa halo dezenvolvimentu ba estrada kontinua kuda ai-horis iha estrada públiku maibé hetan estragu no imajen iha sidade ladúnn furak, entaun ita kontinua ativua operasaun animál espesífiku iha área urbana,” Sekretáriu Rejionál ba Asuntu Agrikultura, José Eta ko’alia iha Oé-Cusse, tersa ne’e.
Nia informa, implementasaun ba polítika ne’e, Autoridade RAEOA liuhosi Sekretáriu Rejionál ba Asuntu Agrikultura no Sekretáriu Rejionál ba Asuntu Administrasaun servisu hamutuk, hahú iha 2020 ho dekretu lei pekuária nian kona-bá retrisaun limitasaun movimentu animál iha área urbana, 2021 iha hahú halo sosializasaun ba komunidade área urbana faze tuir mai kontinua implementa kedas.
Nia esplika, sensibilizasaun ne’e direita ba komunidade iha kada aldeia, no mós fó karta koñesimentu ba animál na’in-sira, aviza mós liuhosi toa tuir estrada públiku no mós aviza liuhosi Rádiu Komunidade Atoni Lifau.
Nune’e atu asegura ambiente iha área urbana sai mós papél importante ba Sekretáriu Rejionál ba Asuntu Agrikultura serbisu hamutuk ho Sekretáriu Rejionál Administrasaun rekruta funsionáriu ordén públika servisu kona-bá kontrola animál no kaptura.
“Implementa lei ida-ne’e hodi kaptura animál sira-ne’ebé la’o livre, tanba animal na’in seidauk iha konsiénsia, entaun kaptura no Autoridade mós prepara ona fatin Sentru ida harii Maquelab suku Taiboko ektare 15 atu akumula animál sira-ne’ebé kaptura,” nia katak.
Nia hatutan, bainhira to’o sentru ne’e, Autoridade fó tempu ba animál na’in-sira durante fulan ida, atu ba hasai, tanba lei mak regula hotu-hotu tenke submete ba regulamentu, ne’ebé rekizitu atu hasai, mai foti formaláriu iha departamentu pekuária, hodi ba selu iha banku, selu hotu tiha aprezenta resibu ba sentru iha suku Taiboko mak foin bele entrega animál.
“Bibi no fahi ida kona multa $50, kuandu karau kona $100, ba bibi no karau oan ne’e livre tanba sai vítima hosi nia-inan, sei liu tiha fulan ida maka animal na’in la aprezenta an signifika avansa ba lelaun ba públiku ho folin hanesan multa ne’e,” nia afirma.
Entretantu, kona-bá rezultadu valór orsamentu ne’ebé rekolla liuhosi kapturasaun animál sira-ne’e, daudaun ne’e ekipa tékniku sei halo verifikasaun ba resibu sira mak hafoin públika fila-fali ba públiku.
Jornalista: Abílio Elo Nini
Editór: Evaristo Soares Martins
