OÉ-CUSSE 27 fevereiru 2023 (TATOLI) – Adjuntu Diretór EBC Boboloa, Firmino Nuno Ulan, fó-sai katak, iha Ensinu Báziku Sentrál (EBC, sigla portugés) Boboloa enfrenta menus sala aula hodi difikulta atividade aprendizajen.
Adjuntu diretór ne’e, fundamenta, atu solusiona problema ne’e, profesór sira tenke serbisu iha oras ualu kada loron, bazea desizaun hosi estrutura eskola buka maneira ba estudante primeiru no segundu siklu tama dadeer no terseiru siklu tama iha parte loraik.
“Problema ne’ebé mak durante ami enfrenta, primeiru edifísiu tanba dezde 2012 iha mumentu terseiru siklu harii to’o ohin loron, tanba edifísiu ne’ebé mak ami uza iha edifísiu rua de’it, ho sala aprendizajen ualu (8) de’it, ne’ebé difikulta tebes ami iha EBC Boboloa tanba estudante barak,” Firmino Nuno Ulan, informa ba jornalista sira iha EBC Boboloa, suku Bobokase, sub-rejiaun Pante Makasar, segunda ne’e.
Tuir nia, iha eskola EBC Boboloa nu’udar eskola sentrál akumula estudante hosi primeiru-anu to’o nonu-anu, iha primeiru no segundu siklu uza sala neen (6), terseiru siklu iha sétimu-anu uza sala rua (2), ba oitu-anu uza sala rua (2) no nonu-anu uza sala rua (2).
“Entaun maneira ne’ebé ami halo, primeiru no segundu siklu tama dadeer terseiru siklu tama lokraik, ida-ne’e maka difikulta tebes ami, tán ne’e ami hanesan estrutura profesór servisu komesa hosi tuku 08:00 dadersan to’o tuku 17:00 lorokraik, iha eskola balu servisu oras haat de’it tuku 08:00 to’o tuku 12:00 meodia, maibé iha EBC Boboloa ami tenke iha dader to’o lokraik,” nia afirma.
“Tan ne’e mak liuhosi oportunidade ne’e ami husu ba Governu, liuliu parte edukasaun sei bele konsidera ami-nia preokupasaun ne’e, atu aumenta sala, ami presiza sala-neen de’it bele sufisiente ona hodi nune’e ami bele tama dadeersan hotu hanesan eskola sira seluk,” nia espera.
Responde ba preokupasaun ne’e, Diretór Edukasaun Oé-Cusse, Daniel Mauno, informa, bazea planu asaun anuál hosi edukasuan rejionál ba tinan 2023, sei konstrui projetu hamutuk unidade 25 no reabilitasaun hamutuk unidade neen (6).
“Problema ba edifísiu no sala aula iha fatin hotu-hotu kuaze menus, la’ós EBC Boboloa de’it maibé fatin seluk mós enfrenta problema hanesan, maibé Governu nafatin esforsu, iha edukasaun ita tau ona iha ita-nia planu tinan ne’e, ita mós tau nafatin konstrusaun no reabilitasaun hamutuk edifísiu neen no konstrusaun foun hamuttuk projetu 25 atu halo iha tinan ne’e,” nia afirma.
Tuir nia, planu ne’e fó prioridade liu ba sala aula, karik iha eskola ruma nesesita duni, depois iha desizaun ikus, tanba iha tinan ne’e edukasaun Oé-Cusse fó liu ba prioridade eskola ba sala aula, nune’e fasilita estudante no profesór sira-bele hala’o prosesu ensinu aprendizajen iha fatin ne’ebé dignu no di’ak.
Dadus estudante iha EBC Boboloa iha anu letivu 2023, iha primeiru no segundu siklu hamutuk 250, ho totál profesór na’in-ualu (8) terseiru siklu hamutuk 245 ho totál profesor na’in-18 ne’ebé totál jerál estudante iha EBC Boboloa hamutuk 595.
Jornalista: Abílio Elo Nini
Editór: Evaristo Soares Martins
