DILI, 27 fevereiru 2023 (TATOLI)—Diretór Organizasaun Naun Governamentál (NGO) Konservasaun Flora no Fauna (KFF), Alito Rosa, husu ba públiku liuliu peskadór sira atu labele estraga ekosistema ahu-ruin iha tasi Timor-Leste.
“Husu ba públiku liuliu peskadór sira bainhira ba halo atividade peska labele hasai ahu-ruin sira iha tasi laran, tanba ekosistema ahu-ruin nia poténsia boot liuliu ba iha aspetu valór ekonómia liga ho turizmu no peska ne’e aas tebes,” Alito Rosa dehan ba Agência Tatoli iha Letefoho Specialty Coffee Roaster, tasi-ibun, Dili, segunda ne’e.
KFF husu públiku labele estraga ahu-ruin tanba iha Timor ne’e kazu barak akontese komunidade kontinua estraga ahu-ruin, faan iha estrada ibun sira.
“Bainhira ita estraga ahu-ruin nia impaktu mak ba ikan sira. Tanba ikan sira ne’e tolun iha ahu-ruin laran. Ho ida ne’e, bainhira ita estraga ikan sira ne’e sei halo mudansa ba fatin seluk, tanba ekosistema ahu-ruin ne’e hanesan uma ba animál tasi,” nia dehan.
Notisia relevante : Lixu barak sei fó impaktu ba biodiversidade tasi
Nia dehan, aleinde komunidade estraga ahu-ruin impaktu seluk ne’ebé bele estraga ba ahu-ruin mak komunidade soe lixu plástiku no ropa obralan ne’ebé soe arbiru deit.
“Lixu plástiku no ropa obralan aat sira sei estraga ahu-ruin tanba bee lori to’o tasi belit metin ahu-ruin no ahu-ruin rasik la hetan naroman hosi loron matan. Entaun nia sei mate, tanba kada ahu-ruin nia atu moris ne’e tenke hetan naroman hosi loron matan no presiza tempu,” Alito Rosa hateten.
Jornalista : Arminda Fonseca
Editora : Armandina Moniz
