EKONOMIA, DILI, HEADLINE

Polisia tenke kontrola sidadaun faan karreta iha dalan públiku

Polisia tenke kontrola sidadaun faan karreta iha dalan públiku

Negosiante faan karreta iha fatin ka estrada públiku besik Kaza Eurepeia tasi-ibun. Imajen Tatoli.

DILI, 23 marsu 2023 (TATOLI)-Diretór Servisu Munisipál Jestaun no Turizmu, Munisípiu Dili, Arthur Henriques,  husu ba Polisia Nasionál Timor-Leste (PNTL)  liuhosi Diresaun Tránzitu atu kontrola sidadaun ne’ebé maka oras ne’e faan karreta ho motor iha trotoár leten estrada públiku nian.

Tanba tuir dekretu lei númeru 33/2008, 27 agostu, atu hala’o fiskalizasaun no monitorizasaun ba atividade ordenamentu teritóriu hanesan ijiéne públika, agora kompeténsia ba kontrolu viatura sira iha dalan públiku no la’ós ami-nia kompeténsia maibé ami sempre koordena ho Polísia hodi hasai sirkulár eskritu no liuhosi pubilisidade ba públiku maibé ema ne’ebé faan nafatin laiha konsiénsia,” Nia hateten ba Tatoli iha Matadouro, Dili, kinta ne’e.

Notísia Relevante :Negosiánte faan karreta iha espasu públiku tenke iha Dealer

Antes ne’e, Autoridade Munisípiu Dili prepara ona fatin provizóriu ba vendedór viátura sira iha área Tasi-Tolu no Caicoli Dili, maibé sidadaun hirak ne’e la kumpre desizaun ne’e hodi kontinua faan iha fatin públiku.

“Ha’u husu ba PNTL atu fó sansaun todan ba sira nune’e labele faan iha dalan públiku. Tanba ami halo kontrolu no avizu iha Dili liliu iha Kaza Europeia nia-oin no iha Prezidente Nicolau Lobato ne’e avizu hela de’it, no sira kumpri ona maibé liu tiha fulan ida-rua sira hahú faan fali, entaun ida-ne’e presiza PNTL nia kontrolu hodi fó sansaun,” nia sujere.

Maske to’o oras ne’e, nia hateten Serrvisu Autoridade Dili seidauk kria fatin permanente ba sidadaun sira atu faan sira-nia karreta no motor, maibé bandu atu labele faan iha fatin públiku tanba hamosu engrafamentu.

Maibé, bazea ba dekretu lei númeru 33/2008 iha artigu 05 to’o 09 hateten katak karik sidadaun balun mak kontra ordenamentu iha kapitál Dili mak Autoridade Munisípiu Dili mós iha kompeténsia atu bele fó hatene ba sira atu labele okupa espasu públiku sira ne’e hodi halo negósiu.

“Maibé ami hein katak ami sei koordena ho Dirasaun Transporte no Komunikasaun , liu-liu Polisía tránzitu sira hodi haree ba kestaun ida ne’e,  tanba ida  ne’e sira-nia kompeténsia. Ami só ba avizu de’it katak ema sai hosi ne’ebá maibé atu foti medida ne’e tenke iha dirasaun ne’ebé toma konta ba ida ne’e liliu Polísia Tranzitu ,” Arthur hateten.

Entretantu, tuir observasaun Agência Tatoli iha terenu nota negosiante sira aproveita espasu públiku iha área Caza Europea, Largo-Lecidere,  área Leader Super-Merkadu, estrada públiku besik Timor Plaza, Embaixada Amérika nia sorin, no Portu Dili oin inklui Igreja Ai-mutin nia sorin no  fatin seluk tan.

Notísia Relevante :AMD sei koordena ho PNTL muda negosiante faan karreta iha espasu públiku

Jornalista : Osória Marques

Editór      : Agapito dos Santos

iklan
iklan

Leave a Reply

iklan
error: Content is protected !!