iklan

NASIONÁL, KAPITÁL

AMD sei koordena ho PNTL muda negosiante faan karreta iha espasu públiku

AMD sei koordena ho PNTL muda negosiante faan karreta iha espasu públiku

Negosiante timoroan balun halo atividade negósiu hodi faan karreta iha espasu públiku iha tasi-ibun besik Kaza Europeia. Imajen Tatoli/Nelia Fernandes.

DILI, 14 setembru 2022 (TATOLI)—Xefe Departamentu Jestaun no Merkadu Munisípiu Dili, Gaspar da Silva, informa iha tempu badak Autoridade Munisípiu Dili (AMD) liuhosi Departamentu Jestaun no Merkadu sei koordena ho Polísia Nasionál Timor-Leste (PNTL) atu muda negosiante faan karreta no motor iha espasu públiku.

Notísia Relevante: PAM Dili la autoriza negosiante faan karreta-motor iha espasu públiku

“Foin lalais iha mudansa kargu xefia sira, maibé iha tempu uluk ita konsega koordena ho Polísia sira kuaze hasai ona negosiante faan karreta no motor iha estrada públiku maibé ikus ne’e ita haree dala ruma servisu barak liu, entaun ita-nia komunidade kuaze ba fila-fali. Maibé, ha’u garante katak horisehik ha’u foin hetan despaixu ba Xefe Departamentu Jestaun no Merkadu ne’e, ba futuru sei koordena ho polísia atu ita bele haree tanba fatin uluk ita hatudu mak iha Tasi Tolu,” Gaspar da Silva hateten ba Agência Tatoli, iha nia kna’ar fatin, Díli, kuarta ne’e.

Ne’ebé, tuir nia, iha tempu badak AMD sei koordena ho PNTL atu bele muda hotu negosiante sira faan karreta no motor iha Estrada públiku ba iha fatin ne’ebé mak Governu hatudu provizóriu hodi halo atividade negósiu.

Nia parte sei koordena ho PNTL ne’e sei halo tuir faze, tanba nia foin asume kargu hanesan Xefe Departamentu Jestaun no Merkadu iha Autoridade Munisípiu Dili.

“Koordena ho PNTL atu muda sai ita-nia negosiante faan motor no karreta iha estrada públiku ne’e, ita sei halo tuir faze tanba agora ha’u tenke hadi’a no haree uluk iha uma laran, tanba ha’u foin asume kargu nu’udar Xefe Departamentu Jestaun no Merkadu. Ita mós hatene di’ak iha merkadu sira deskontroladu, tanba dala ruma jestór sira laiha plánu ho di’ak, entaun ho ha’u-nia kna’ar ida-ne’ebé agora entrega mai ha’u no ha’u sei enkontru ho ha’u-nia membru sira atu hato’o ha’u-nia planu ba sira, nune’e bele la’o tuir lei no orden ne’ebé iha. Se lae, sabraut hela,” nia dehan.

Jornalista : Nelia Fernandes

Editór      : Cancio Ximenes

iklan
iklan

Leave a Reply

iklan
error: Content is protected !!