Edencio da Costa salva Porto Taibesi hosi lakon ba empata

DILI, 24 marsu 2023 (TATOLI) – Ekipa primeira divizaun Liga Futeból Timor-Leste (LFTL) Porto Taibessi FC ameasadu lakon hosi jogu kontra AD SLB Laulara, maibé ikus iha minutu ikus liu jogadór Edencio da Costa (13) konsege salva ekipa ne’e halo empata 1-1 nune’e klube rua bele fahe pontu ba malu ho hanesan.

Jogu ba ekipa rua hanesan jogu kontinuasaun Liga Futeból Timor-Leste époka 2022-2023 ne’ebé realiza iha Estádiu Munisipál Dili sesta lorokraik ne’e.

Jogu ba ekipa rua iha ámbitu ne’ebé manas ka tensaun altu tanba animadu tebes hosi adeptu sira ne’ebé tuur nahe aan iha tribun Estádiu nian nakonu hosi laran sai to’o liur haklalak hodi fó Gloria ba ekipa favoritu ida-idak.

Hosi animasaun adeptu sira nian, halo minutu primeiru jogu komesa ekipa rua enerjétiku hodi lansa kedan kontra no atake ba malu tuir tékniku no abilidade ida-idak iha kampu-laran be nahe ho du’ut matak no mamar nia leten.

Kontra no atake ne’ebé ekipa rua halo hatudu lolos no momós katak laiha forsa ne’ebé la diferente, ho nune’e jogadór sira iha kampu-laran komesa halo erru ba malu.

Ho nune’e árbitru ne’ebé lidera hosi Pedro Carvalho sente erru ne’ebé jogadór sira lansa merese simu duni kartaun kinur atu labele kontinua tan erru nune’e bele hala’o jogu ho kalma.

Jogu la’o to’o de’it minutu ikus avansadu prinsipál hanesan mós kapitaun ekipa SLB Mouzinho Barreto de Lima halo erru hasoru jogadór Porto nian árbitru Pedro foti kedan desizaun seriu fó kartaun kinur ba jogadór ne’e.

Liu de’it minutu balun, iha minutu 10 jogadór Porto Danilson Araujo (16) halo erru hasoru jogadór SLB árbitru tenke foti mós kartaun kinur ba jogadór ne’e.

Nune’e jogu kontinua la’o ho normál SLB halo kontra no atake ne’ebé masimu tebes nune’e iha minutu 14 jogadór Alexander Kefy (21) hetan bola livre ida lansa kedan golu ba ekipa Porto muda rezultadu ba 1-0.

Hosi golu ne’e halo adeptu sira kontente liutan hodi hakilar maka’as halo Estádiu ne’e atu nakfera de’it, kontente ne’ebé iha hodi fó gloria ba ekipa ho naran istimadu Makikit Laulara.

Jogu la’o to’o tan minutu 18 jogadór Mouzinho de Lima komete tan erru hasoru jogadór Porto árbitru laiha ona toleransia fó tan kartaun kinur ida hodi foti kartaun ikus ba nia ho mean hodi haruka jogadór ne’e tenke haksumik aan kedan hosi kampu-laran laiha tan direitu atu joga tan laiha ona direitu hanesan kapitaun hodi entrega fali kapitaun ba Filipe Oliveira (24) mak sai fali hanesan kapitaun ekipa.

Jogu komesa manas liutan Porto Taibessi komesa domina hikas bola bainhira Mouzinho sai hosi kampo laran, maibé domina ne’ebé iha fó sorte aat ba Porto tanba iha minutu 19 jogadór Januario Pinto (5) halo erru hasoru jogadór SLB árbitru foti kedan kartaun kinur ba jogadór ne’e hanesan samada atensaun.

Porto nunka lakon esperansa iha kampo laran joga ho kalma no fiar aan sei hatama golu hodi halo empata jogu ne’e maibé sutu barak mak avansadu sira halo seidauk kona iha alvu no balu guarda rede konsege salva.

Tanba ritmu jogu sa’e maka’as iha minutu 21 jogadór Porto Frederico Silva (19) halo erru hasoru jogadór SLB árbitru fo kedan kartaun kinur ba nia, maibé ekipa rua nafatin joga ho solidu liu hosi tatiku jogu defensive no ofensivu.

Maibé tatiku hirak ne’e provizóriu hela de’it hanesan tatiku tanba to’o minutu primeira parte termina laiha tan golu ruma mak akontese ba ekipa rua obrigadu SLB mak lidera jogu iha minutu 45 nia laran.

Dolar ba segunda parte ekipa rua nafatin lansa kontra no atake ba malu tuir tékniku ne’ebé iha Porto domina makas jogu maibé seidauk to’o iha nia finalidade, maibé kontinua semangat tanba ho fiar aan katak sei halo empata jogu ne’e.

Jogu la’o naruk tebes ona tuir oras ne’ebé halai hosi minutu ba minutu nune’e iha minutu 83 sorte aat akontese ba Porto Taibessi tanba jogadór Frederico ne’ebé iha minutu 21 hetan kartaun kinur ne’e komete tan erru hasoru jogadór SLB ikus nia mós tenke simu tan kartaun mean hodi sai mós hosi kampo-laran.

Minutu 90 termina ona golu ida nunka akontese tan ba ekipa rua ne’e, ho nune’e árbitru no komisaun jogu foti desizaun hodi aumenta tan adisionál tempu ba minutu neen tan.

Ho minutu adisionál ne’e Porto aproveita kedan oportunidade ho esperansa ne’ebé makas ikus esperansa ne’e la hela de’it hanesan esperansa iha duni rezultadu ne’ebé signifikativu tanba iha minutu 90+6 defeza SLB Filipe Oliveira halo erru hasoru jogadór Porto Taibessi iha kedan lina oin SLB nian árbitru foti desizaun fó kedan penalidade ba Porto atu ezekuta sutu livre.

Hosi rezultadu árbitru nian ne’e halo adeptus SLB nian tenke tur tane hasan ho lian laek atu rona no hateke de’it saida mak atu akontese, maibé adeptu Porto Taibesi nian hakilar maka’as kontente tanba fiar katak rezultadu ne’e halo empata duni jogu ne’e.

Penalidade ne’e ezekuta hosi jogadór Edencio da Costa ikus fó duni rezultadu pozitivu tanba sutu ne’ebé nia lansa guarda rede SLB Filonito Nugeira (12) halai sala bola tama liu ba laran muda kedan rezultadu ba 1-1 iha minutu 90+7, árbitru tenke termina jogu.

Eskuad Porto Taibessi:

Juvencio Henriques (1), Calaudio Araujo (4), Miguel Silva (2), Edencio da Costa (13), Frederico Sila (19), Feliz Gama (15), Anggiso Barbosa (12), Inosensius Ati (3), Jardel Piedade (9), Lazio Piedade (77), Danilson Araujo (16).

Suplente:

Marcio das Dores (24), Januario Pinto (5), Jerico Piedade (45), Nicson Berek (6), Nelvio Almeida (7), Romer Martins (17), Derson Ulu (14), Eusebio de Almeida (8), Helman Asan (11), Yohanes Jehaman (10), Gabriel Lopes (20).

Treinadór: Mirobaldo Bento

Eskuad SLB:

Filonito Nogueira (12), Bakayoko ozi (2), Micehl Hutabarat (26), Jhon Frith (6), Cristovão Fernandes (23), Filipe Oliveira (24), Fernando de Carvalho (3), Jeremias Baptista (69), Kornelis Portela (11), Alexandro Kefi (21), Mouzinho de Lima (10).

Suplente:

Andrew Mensah (13), Tomas Sarmento (4), Natalino da Costa(8), Nidio Alves (93), Aldo Amaral (19), Domingos Ribeiro (22), Alexandro (9), Norbert Gonçalves (14), Vabio Pires (28), Marques de Carvalho (29), José Pinto (27), .Vabio Pires (28).

Treinadór: Julião Monteiro

Jogu ne’e dirije hosi árbitru prinsipál Pedro Carvalho, juiz liña Filomeno da Silva, Ivo Moniz no árbitru rezerva Pedro Braga.

Tabela klasifikasaun provijoriu