OÉ-CUSSE 03 abríl 2023 (TATOLI) – Iha trimestre dahuluk, fulan janeIru to’o fulan-marsu 2023 ne’e, Departamentu Rejionál Transporte Terrestre (DRTT), Rejiaun Administrativa Espesiál Oé-Cusse Ambeno (RAEOA), rekolla reseita rihun $28,265.00 ba kofre Estadu liuhosi tratamentu dokumentu ba transporte sira iha rejiaun espesiál ne’e.
Notísia relevante; Autoridade RAEOA halo abertura distribuisaun xapa-matríkula orijinál
Xefe Departamentu Transporte Terrestre RAEOA, Silvestre Sila Teme, informa, reseita ne’e kobre mai hosi tratamentu dokumentu transporte sira hanesan; karta kondusaun renova, rejistu no rejistu foun, no renova dokumentu inspesaun.
“Trimestre primeiru ita hetan reseita iha RAEOA nian, janeiru rihun $12,190.00, fevereiru rihun $15,168.50 no iha marsu nian seidauk hotu foin to’o loron 24 marsu ne’e hamutuk $9,650.00, totál fulan tolu ne’e hamutuk rihun $28,265.00,” Silvestre Sila Teme, informa ba jornalista sira Oé-Cusse, segunda ne’e.
Diretór DRTT Oé-Cusse, konfirma, durante ne’e difikuldade ne’ebé enfrenta iha atendimentu públiku, maka dokumentu transporte no karta kondusaun, daudaun ne’e sei fasilíta ho provizóriu, maibé DRTT enkamiña ona proposta ba iha Gabinete Prezidente Prezidente Autoridade hodi ajenda iha planu asaun anuál.
“Difikuldade barak, maibé ita labele ejize Governu presiza la’o neineik, problema ne’ebé ami enfrenta levanta ona iha diresaun no Gabinete Prezidente Autoridade, atu tau iha planu asaun tinan oin, tanba problema ne’ebé ami hasoru primeiru dokumentu transporte sei provizória tanba seidauk ida mákina imprime ba orijinál, daruak kona-bá instalasaun no karta kondusaun ita uza de’it provizória tanba blankU oriJinál iha ona maibé presiza fotografia,” nia katak.
Entretantu, liga ho atendimentu dokumentu parte DRTT Oé-Cusse durante ne’e, iha kooperasaun di’ak ho Polísia Unidade Tránzitu Oé-Cusse, maibé kona-bá reseita infrasaun tránzitu la inklui iha reseita DRTT nian.
“Sé bainhira sira kaptura motorista no deteta dokumentu la tuir padraun, sempre komunika mai iha departamentu transporte, ne’ebé komunikasaun durante ne’e la’o di’ak,” nia katak.
Notísia relevante: Tinan 2022, DRTT Oé-Cusse hatama rihun $89-resin ba kofre Estadu
Jornalista : Abílio Elo Nini
Editór : Evaristo Soares Martins
