ERMERA, 21 abríl 2023 (TATOLI) – Konstrusaun Eskola Sekundária Tékniku Vokasionál (ESTV) Cavo Martinho, iha Suku Fatu-Bolu, Postu Administrativu Hatulia B, Munisípiu Ermera atinje ona 75%.
Diretór ESTV Cavo Martinho, Julio Menezes Soares haktuir katak, konstrusaun edifísiu foun kompostu husi sala aprendijazen tolu, sala ba profesór sira hamutuk tolu, no haris fatin rua.
Edifísiu refere konstrui husi kompañia Ass-Lau Unip.Lda ho totál orsamentu estadu ne’ebé mak aloka husi Ministériu Edukasaun Juventude no Desportu hamutuk rihun $239 resin dollar amerikanu.
“Konstrusaun ba edifísiu ne’e, hahú iha fulan janeiru 2022 no tuir kontratu sei terimina iha fulan juñu 2022. Maibé, tanba xefe badaen lori halai lakon tiha osan traballadór sira-nian hamutuk US$11,000 ba Indonésia. Ho nune’e mak fó impaktu ba aselerasaun projetu refere,” Diretór hato’o ba Tatoli, iha ninia knár fatin ESTV Cavo Martinho Ermera, sexta ne’e.
Notísia Relevante: https://tatoli.tl/2023/02/07/dndpe-ezije-projetu-kapital-dezenvolvimentu-tenke-konklui-iha-maiu/
Nia mós hatutan katak razaun seluk ne’ebé impede prosesu konstrusaun ba edifísiu ne’e mak dezastra naturais, hanesan udan bo’ot ne’ebé mak kauza dalan kotu barak iha liga diresaun Ermera vila no Glenu: “Dalan mós difikulta tanba atu tula materiál konstrusaun mai susar teb-tebes.”
“Tanba ne’e mak konstrusaun edifísiu foun refere foin mak atínji mais ou menus 75%. Tuir ita-nia estimasaun, iha fulan jullu hanesan ita bele termina ona no hakat ba inagurasaun,” Diretór Julio esplika.
Notísia Relevante: https://tatoli.tl/2021/12/01/konstrusaun-eskola-203-atraza-tanba-presiza-kumpre-regra-balun/
“Ba oin, ita sei buka tan profesores tanba iha departamentu agrikóla ne’e profesór sira sei menus,” Nia akresenta.
Kona-ba prosesu aprendijazen, Nia dehan, estudante sira além aprende iha aula laran, sira mós iha oportunidade hodi aprende iha prátika: “Ita-nia modelu aprendijazen mak 25% teoria no 75% prátika. Liga ho aktiviade prátika mak hanesan kuda ai horis, etc.”
“Entaun, ba sira ne’eb’e mak terseiru anu, sei tun ba terenu hodi halo prátika liu husi estájiu professionál iha instituisaun oi-oin hanesan UNAR, Avansa Agrukultura, Insititutu Matadalan Integradu (IMI), Produsaun Ai-Kulat, IADE, SEKOOP, Banku Tuba Rai no BNCTL,” Julio konklui.
Entertantu, ESTV Cavo Martinho harii iha 2017 ho departamentu rua mak hanesan Komérsiu no Agrikóla ho Totál estudante ne’ebé mak agora daudaun hala’o hela aprendijazen iha eskola refere hamutuk 368. Númeru profesór ne’ebé hanorin iha eskola ESTV Cavo Martinho hamutuk 23.
Notísia Relevante:https://tatoli.tl/2020/08/27/estv-hatulia-laiha-ekipamentu-laboratoriu/
Jornalista: Filomeno Martins
Editora: Nelia Borges
