AINARO, 23 abríl 2023 (TATOLI) – Partidu Dezenvolvimentu Nasionál (PDN) ho númeru sorteiu 1 promete sei dezenvolve setór turizmu iha postu administrativu Hatu-Udu, munisípiu Ainaro.
Prezidente PDN, Lucas Soares Kolibere, hato’o kompromisiu polítiku ne’e iha kampaña tipu diálogu ne’ebé hala’o iha Hatu-Udu Vila.
Líder partidu ne’e afirma, PDN lakoalia kona-ba istória, maibe defende povu nia moris no prepara futuru jerasaun foun atu kontinua lori nasaun ne’e ba oin.
“Iha Hatu-Udo, prioriza primeiru turizmu, tanba ne’e ita tenki dezenvolve setór ne’e, nia mak sai hanesan rendimentu ka in come ba povu, iha postu administativu ida ne’e”, Lucas Soares Kolibere informa ba Ajénsia Tatoli, domingu ohin.
Dirijente ne’e realsa, atu dezenvolve setór turizmu iha Hatu-Udo, importante mak tenki hadia infraestrutura bázika, liuliu estrada atu fasilita povu lori sira nia produtu ba merkadu no mós bele ajuda konsumidór sira produtu lokál.
PDN mós fó prioridade ba dezenvolvimentu setór agríkola no fasilita kréditu ba povu, liuhusi Fundu Petrolíferu.
“PDN defende foti osan husi Fundu Minaria no tau iha banku sira iha kada munisípiu no postu administrativu atu fasilita sidadaun sira ne’ebé hari’i koperativa bele asesu ba kréditu hodi halo atividade ekonómika hodi hadia sira nia moris, maibé importante mak tenki fó fila osan inan. Ida ne’e mak PDN defende makas”, nia haktuir.
Notísia relevante: PDN fó prióridade hadi’a infraestrutura iha Maucatar
Jornalista: Afonso do Rosário
Editora: Isaura Lemos de Deus
