DILI, 27 abríl 2023 (TATOLI) – Partido Os Verdes de Timor (PVT) kompromete sei kombate no halakon monopoli ba kafé folin ne’ebé mak durante ne’e komete no prátika husi kompania sosa kafé sira.
Prezidente PVT António Lela Huno iha ninia intervensaun iha kampaña polítika iha Munisípiu Ermera hateten, kompañia kafé barak ne’ebé mak agora dau-daun sosa kafé iha munisípiu Ermera kontinua halo monopoli ba kafé folin.
“Ermera kontinua Esporta kafé musan tanba laiha idustria kafé iha Ermera no kompania kafé sira kontinua halo monopoli ba kafe folin,” António hato’o iha kampaña PVT nian iha munisipiu Ermera.
Nia dehan, kafé folin loloos ne’e la’os mak ida agora $0.35 sentavus ne’e. “PVT ho ninia aliadus hakarak hasa’e kafé folin iha Timor-Leste.”
António enfaze katak atu hasa’e kafé folin, tenke halakon uluk lai prátika monopoli kafé folin ne’ebé mak komete husi kompañia sira.
“Iha 2002, kafé kulit tasak mean kilo ida folin $0.20, no iha 2023, kafé kulit tasak kilo ida folin $0.35. Imi konsiente ka la’e, iha tinan 20 nia laran kafé folin sa’e de’it $0.15 husi $0.20 ba $0.35,” António esplika.
Tanba ne’e, tuir nia,PVT hakarak halakon monopolio kafé folin hodi hadi’a povu nia moris, liu-liu kafekultór sira iha munisípiu Ermera.
Entertantu, durante kampaña ne’e, sekretáriu jerál PVT, Santana Martins hato’o mós programa prinsipál PVT nian hodi kompete iha eleisaun parlamentár tinan ne’e.
Programa hirak ne’e mak hanesan: Aselera desentralizasaun podér lokál; edukasaun no infromasaun (investe iha pré-eskolár, eskola tékniku vokasionál, no formasaun profesionál); Saúde (kuidadu saúde primária, sekundária no terseiru); inkluzaun sosiál, protesaun sosiál no solidaridade; infraestrutura (avansa ho sidade verdes); agrikultura, pekuária, peskas no florestas; Turizmu (dezenvolve turizmu komunitária, turizmu ekolozíku, turizmu aventura, turizmu relijiozu, turizmu istóriku, turizmu kulturál no etnográfiku); komérsiu no indústria; reforsa seitór finanseiru; ikus liu mak kompromisiu kontinua apoiu projetu tasi mane.
Jornalista: Filomeno Martins
Editora: Nelia Borges
