DILI, 28 abríl 2023 (TATOLI) – Partido Congresso Nacional de Reconstrução de Timor-Leste (CNRT) kondena maka’as atu bandalizmu ne’ebé hatudu hosi indivíduu no grupu balun ne’ebé uza atributu Partidu FRETILIN hodi halo agresaun fízika hasoru militante no apoiante CNRT iha munisípiu Viqueque, iha postu administrativu Uatulari hodi harahun uma no hakanek ema.
Aleinde ne’e, atu kriminozu sira ne’ebé maka akontese iha Uailili, Gariwai, Vemase no Rejiaun Administrativa Espesiál Oé-Cusse Ambeno.
Portavós no Koordenadór Polítika Esterna Partidu CNRT, Roberto Soares, konsidera atu violentu sira ne’e kondenavel, tanba prejudika tebes prinsípiu no valór demokrasia no direitu síviku sidadaun nian. Partidu konsidera atu sira ne’e bele kontribui ba instabilidade nasionál no halo populasaun ein jerál moris la hakmatek no halo sira bele halakon sira-nian interese atu partisipa iha eleisaun jerál ne’ebé atu mai.
“Ami husu ba militante no simpatizante husi partidu sira seluk atu respeita ita-nian Estadu hodi lori prosesu konsolidasaun no demokratizasaun hodi determina mudansa ba país no destinu povu ida ne’e nian”, Roberto Soares apela iha Bairro dos Grilhos, sesta ne’e.
CNRT husu mós ba Komisaun Nasionál ba Eleisaun (CNE, sigla portugé), ba Polísia Nasionál Timor-Leste (PNTL) no autoridade suku sira atu tau-matan ba hahalok husi militante partidu polítiku sira iha períodu kampaña, nune’e kria ambiente hakmatek.
Partidu ne’e mós husu ba órgaun eleitorál no autoridade polisiál atu prosesa sidadaun militante partidu sira ne’ebé mak halo ona asaun bandalizmu hasoru adversáriu partidu sira seluk.
“CNRT konsidera bainhira laiha ema ida maka kontrola hahalok brutalizmu husi militante ne’ebé deskontroladu iha sira-nia komportamentu, sei fó marjen atu ita la respeita prosesu demokratizasaun ne’ebé hahú buras iha ita-ian rain ne’ebé ohin loron Timor-Leste lidera iha tabela ranking ba respeitu demokrasia iha rejiaun Sudeste Aziátiku”, nia salienta.
Partidu CNRT hakarak apela ba líder partidu polítiku sira hotu atu kontrola hahalok husi militante no simpatizante sira iha períodu kampaña atu labele provoka situasaun hodi hamosu insidente ne’ebé hamosu krime no estraga uma populasaun ka militante hosi partidu seluk nian.
“Partidu CNRT nafatin apresia ba servisu ne’ebé autoridade seguransa sira presta durante kampaña hodi halo atuasaun ba provokasaun ne’ebé akontese iha parte identifikasaun ba risku. CNRT apela no enkoraja nafatin ba autoridade polisiá nia servisu atu nafatin fó seguransa másima ba militante sira hodi labele provoka malu.
Forsa polítika ne’e husu nafatin ba PNTL sira atu fó apoiu ba atividade kampaña ho profisionál hodi asegura lei no orden públiku baihira atua krime ruma hodi labele hakmaan parte ida no hatodan fali parte seluk.
Tuir Komandu PNTL, konfrontu iha loron 27 abríl 2023, iha aldeia Dasuwate, suku Afaloicai, postu administrativu Uatolari, rezulta komunidade nia uma hamutuk hitu mak hetan estragu no vítima na’in-16, maibé la grave.
Notísia relevante: PNTL Viqueque identifika ona autór ba konfrontu iha Uatolari
Jornalista: Tomé Amado
Editora: Maria Auxiliadora
