ERMERA, 28 abril 2023 (TATOLI) – Komunidade husi suku tolu – Urahou, Fatubolu no Mau-Ubu iha Postu administrativu Hatulia B, husu ba governu aselera prosesu instalasaun eletrisidade, tanba seidauk iha asesu ba eletrisidade hanesan suku viziñu sia.
Lia menon hirak ne’e hato’o husi líder komunitária suku tolu durante dialógu komunitária entre MAPKOMS no komunidade sira husi Postu Administrativa Hatulia B, iha Suku Licapat, Munisípiu Ermera, sesta ne’e. ]
“Entre suku lima ne’e, só Suku Urahou no Suku Mau-Ubu mak sei nakukun hela,” Xefe Suku Urahou, Alberto Soares hato’o kestaun ne’e ba Ministru MAPKOMS, Francisco Jerónimo durante dialógu refere.
Iha fatin hanesan, Xefe Suku Fatubolu, Adelino dos Santos mós hato’o ba MAPKOMS kona-ba Aldeia rua – Poerema no Apiradu ne’ebé mak seidauk iha asesu ba eletrisidade.
“Iha hau-nia suku Fatubolu, só iha aldeia Poerema ho Apiradu mak seidauk iha asesu ba eletrisidade. Nune’e mós bee moos no Estrada,” Líder Komunitária Suku Fatubolu ne’e hateten.
Hatan ba preokupasaun hirak ne’e, Ministru Jeronimo hateten, instalasaun materiál eletrisidade ba suku Urahou no Mau-Ubu iha ona faze konkursu públiku.
“Ba Na’i Xefe Suku nain rua nia suku ne’ebé mak ahi seidauk tama ne’e, ha’u hatene, EDTL mai halo prosesu hotu ona. EDTL sira lansa hela tenderizasaun no bainhira los hotu ona sira sei mai,” Governante ne’e esplika.
Nia énfase katak, VIII Governu Konstitusionál ninia kompromisu mak iha 2023 problema eltrisidade ne’e tenke rezolve kedas antes termina mandatu.
“Ba Aldeia sira, karik lina eletrisidade la bo’ot no ninia orsamentu la kiyik, hau hanoin EDTL nu’udar empreza públiku, iha ona lei fó kbi’it ba sira atu bele dada rasik ahi no la persiza halo tenderizasaun. Ba aldeia no bairru sira ne’ebé mak orsamentu ki’ik, EDTL mak hola fiu no materiál hodi halo montajen. Ne’e mak ita bolu programa eletrisidade komunitáriu,” Ministru salienta.
Governante ne’e reiteira mós katak instalasaun eletrisidade ba suku tenke mai ho konkursu públiku.
“Tuir informasaun ne’ebé mak ha’u simu katak sira loke ona tender no hein de’it se mak manan, sira ba kaer projetu instalasaun eletrisidade ba suku rua ne’e,” nia informa.
Jornalista: Filomeno Martins
Editora. : Nelia Borges
