Autoridade Ermera destrui ai-han liu prazu
DILI, 29 abril 2023 (TATOLI) – Autoridade Munisípiu Ermera destrui ai-han liu prazu ho item 71 hafoin halo operasaun intensivu husi janeiru to’o marsu hodi halo apriensaun ba ai-han prazu ne’ebé sei kontinua fa’an husi komersiante sira.
Item sira ne’ebé mak apriendidu husi operasaun konjuntu entre autoridade seguransa alimentár hamutuk ho Polísia Nasionál Timor-Leste (PNTL) iha postu administrativu ne’en iha Munisípiu Ermera mak hanesan Railaco, Ermera, Hatulia A, Hatulia B, Letefoho, no Atsabe.
Ai-han liu prazu sira ne’e rekolla husi 296 loja sira iha postu administrativu ne’en refere.
Item liu prazu sira ne’e destrui iha Gleno ho prezensa Autoridade Munisípiu Ermera, PNTL, F-FDTL, Saúde Munisipál, Agrikultura, Seguransa Sívil no seluktan.
Item sira ne’e mak hanesan Tiara, Tango, Tango Boot, Tango Chocolate, Tango kiikm Ben-Ben, Micoko, Garuda, Pop Mie, Sosis Sonica, Coconut, Oreo, Strawberry, Susu Lactogen, Chocolates, Mozenaco, Donuais Lalipos, Masako, Roti Beta, Extrajos, Cokpiko, Bombon, Biskuat, Deka Jumbo, Cocoa, Fermifan, Mie Goren, Mie Goren Intermi, Pandan Kelapa, Maxi, Olaris, Permen Keras, Segar Sari, Ai-moruk Acdo, Susu Tango Kido, Santan Kelapa, Bongo Wafer, Cood Lips, Super Mama, Coka, Biskuit Wafer, Gabin, Energen, Go Potato, Café Los, Pop Ice, Tik tak, Jagun Bakar, Sukro, Cocacola, Saus Lombok, Florindina, Delos, Sprite, Jamur, Jelly Sake, Bicola, Susu Enak, Kecap Manis, Kecap Asin, Bimoli 2 liter, Larutan Penyegar, Susu Mojico, Susu Enak Plastik, Obat-obatan Captopril, Tepung Beras Putih, Soda Kue, Indo Milk, Kecap Asin Abc, no Saus Tomat Abc.
“Atividade ida ne’e planu autoridade seguransa ai-han munisípiu Ermera nian. Entaun iha trimester tuirmai ne’e ita sei halo tan atividade hanesan. Tinan ida ita halo operasaun dala ha’at, entaun ita sei iha tan operasaun dala rua tan,” Diretór Seguransa Ai-han, Munisípiu Ermera, Danilo Osorio Babo ba jornalista iha Glenu Ermera, sesta ne’e.
Nia hateten, bai-bain, komersiante sira ba sosa sasan iha Dili, entrega lista ba no loja-na’in aproveita tula mós ho item sira ne’ebé mak liu ona prazu. “Entaun sira ba sosa sasan iha Dili la haree sasan sira-nia prazu.”
“Ba oin, ita sei serbisu hamutuk ho ekipa Komérsiu Indústria no Jestaun Merkadu hodi halo sensibilizasaun ba negosiante sira para ajuda sira bele lee sasan nia prazu,” Danilo esplika.
Nia esplika, item balun nia data liu prazu ne’e monu iha 2019 maibé komersiante sira sei kontinua faan nafatin. “Maioria husi item sira ne’e mak makanan ringan ne’ebé mak labarik sira gosta han.No ida ne’e bele fó mpaktu negativu ba labarik sira hanesan keracunan makanan ou hahan lanu,”
“Horseik ita iha labarik ida ne’ebé mak iha keracunan makanan no agora dadaun iha hela ospitál tanba han item balun ne’ebé mak liu prazu,” jerente ne’e informa.
Jornalista: Filomeno Martins
Editora: Nelia Borges
