DILI, 29 abril 2023 (TATOLI) – Partidu Kmanek Haburas Unidade Nasionál Timor Oan (KHUNTO) ho númeru sorteiu 05 hakarak tau prioridade ba setór turizmu, tanba durante Timor-Leste depende liu ba Fundu Petrolíferu.
Prezidente Partidu KHUNTO, Armanda Berta dos Santos, promete bainhira ka’er ukun ho Plataforma Entendimentu, sei diversifika ekonomia rai-laran atu nune’e labele depende liu ba Fundu Petrolíferu, tanba kada tinan 90 % orsamentu depende ba setór ida ne’e.
“Partidu KHUNTO nia hakarak atu diversifika ekonomia rai-laran, bainhira manán eleisaun hamutuk ho plataforma entendimentu hanesan partidu Frente Revolucionária Independente de Timor-Leste no Partidu Libertação Popular bainhira forma Governu”, dehan Armanda Berta dos Santos, iha mini kampanã, iha Kampu Hera, sabdu ne’e.
Tuir nia, KHUNTO defende mós dezenvolve setór produtivu seluk hanesan agrikultura atu bele melhora rai ida ne’e.
“Ita sei dezenvolve setór ida ne’e, hanesan alternativa seluk atu bele kontribui mós reseita mós ba makina estadu iha Timor-Leste”, nia dehan
Armanda Berta dos Santos dehan tenki investe iha setór saúde, edukasaun, infraestrutura atu bele hadia povu-nia moris.
“Ami KHUNTO mós lahaluha asuntu veteranu no martires ninia-oan sira no seluk tan, tanba ho sira mak Timor-Leste bele ukun a’an”, dehan nia.
Prezidente KHUNTO mós esplika susesu Oitavu Governu-nian mak hanesan: implementa subsídiu fim do anu ba kada uma kain hotu iha Timor-Leste, hasa’e osan pensaun sosiál husi $30 ba $50, bolsa da mãe no seluk tan.
Armanda Berta dos Santos defende katak partidu sei ka’er ba prinsípiu filozófia fundamentál partidu nian mak “tane ó rai, ó ema no ó lisan”. Ho prinsípiu hirak ne’e, partidu KHUNTO nia vizaun mak hari’i sosiedade ida ne’ebé livre, justu, akuntável no demokrasia ho abut metin iha fé, esperansa no karidade.
“Vizaun ida ne’e prenxe duni valór independénsia nu’udar país demokrátiku hodi partisipa ho ativu iha dezenvolvimentu nasionál”, nia reafirma.
Notísia relevante: Ema deskoñesidu tuda militante KHUNTO iha Laclo
Jornalista: Domingos Piedade Freitas
Editora: Isaura Lemos de Deus
