COVALIMA, 29 abríl 2023 (TATOLI)–Prezidenta Partidu Libertasaun Popular (PLP), Taur Matan Ruak, kompromete bainhira povu fó fiar iha eleisaun parlamentár hodi kaer ukun mak PLP hakarak dezenvolve uma lisan sai fatin hametin unidade no turizmu kulturál.
Notísia Relevante: PLP konsidera diversifikasaun ekonomia iha setór tolu
“Ita sei dezenvolve ita-nia uma lulik sira hodi transforma ita-nia uma-lisan sira sai fatin hametin unidade entre uma lisan ida no uma lisan sira seluk, nune’e bele sai fatin turizmu kulturál,” Taur Matan Ruak hato’o nia promesa ne’e, bainhira hala’o kampaña eleitorál ho tipu komísu iha eis prizaun Covalima Suai Loro, sábadu ne’e.
Aldeinde ne’e, Prezidente PLP ne’e deklara hakarak kontinua hametin programa sira-ne’ebé mak durante iha nia lideransa hanesan Primeiru-Ministru implementa ona, nune’e kontinua hatutan programa ne’ebé implementa ona maibé seidauk finaliza hodi kontinua nafatin
“Ita deklara ba mundu, ita hakarak lori nasaun ba oin. Agoram, se povu óo fiar mak sei hametin programa sira-ne’ebe ita halo ona. Maibé, hatutan buat sira hakarak halo iha loron oin mai hanesan estrada ladi’ak, Suai-oan mak tau matan ba Estrada hirak ne’e,” nia dehan.
Koordenadór PLP munisípiu Covalima, Quintino da Costa, hateten hakarak halo mudansa lori povu Timor-Leste ba mundu no hakarak lori povu Timor-Leste ba moris di’ak.
Atividade kampaña eleitorál ne’e partisipa másimu hosi militante no simpatizante sira, hetan seguransa hosi Polisía Nasionál Timor-Leste no observa hosi Komisaun Nasionál Eleisaun (CNE-sigla portugés) no Provedoria Direitu Humanus no Justisa (PDHJ).
Jornalista : Celestina Teles
Editór : Cancio Ximenes
