ERMERA, 01 maiu 2023 (TATOLI) – Partidu Libertasaun Popular (PLP), ohin, adia kampaña eleitorál iha munisípiu Ermera ba loron 18 maiu, 2023.
“Ita muda kampaña iha Munisípiu Ermera ba loron 18 maiu. Ne’ebé kampaña ohin iha Kampu Futebol Gleno la realiza,” Vise II Kordenadór PLP Munisípiu Ermera, Julio do Rosario Lemos ba Tatoli via telefone, segunda ne’e.
Nia dehan, adiamentu ba kampaña refere deside husi estrutura PLP, no sira informa ona ba CNE hodi adia ba loron 18 maiu.
“Tuir oráriu kampaña, PLP nian kampaña iha duni Ermera, maibé ami mak muda ba dia 18, atu nune’e abertura iha Baucau no taka iha Ermera,” Julio salienta.
Tuir oráriu husi CNE, PLP ne’ebé ho númeru sorteiu 3 ne’e sei hala’o mini kampaña iha Postu Administrativu Atsabe, Munisípiu Ermera.
“Aban, ita-nia belun bo’ot Prezidente PLP, Taur Matan Ruak sei marka prezensa iha Atsabe para halo dialógu. Depois ida ne’e, Prezidente PLP sei dezloka kedas mai Postu administrativu Hatulia B atu halo mós mini kampaña,” Julio informa.
Bainhira husu kona-ba razaun husi adiamentu ba kampaña refere, Julio dehan: “Razaun adiamentu ne’e katak ami mak husu atu muda duni.”
“Ami informa ona ba CNE kona-ba adiamentu ne’e no aprova ona ba dia 18 maiu,” Julio konklui.
Jornalista: Filomeno Martins
Editora: Nelia Borges
