DILI, 06 maiu 2023 (TATOLI)–Papa Francisco husu ba líder Timor-Leste bainhira foti desizaun ruma tenke hili desizaun di’ak liu hodi lori propriedade no pás ba nasaun tomak.
“Ha’u deseja di’ak ba imi hotu. Bainhira imi halo desizaun ruma, ha’u hein katak imi hatene halo desizaun ne’ebé di’ak liu hotu, mak sira ne’ebé lori prospriedade no pás ba família no nasaun laran tomak,” Papa Francisco, hateten liuhosi nota ne’ebé Agência Tatoli asesu, sábadu ne’e.
Mensajen ne’e hato’o iha ámbitu Arsebispu Arkidioseze Metropolitana Dili, Don Virgílio do Carmo da Silva, ho delegasaun hosi Timor-Leste hala’o vizita ba Santa Sé, Roma, hodi hasoru malu ho Papa Francisco, ne’ebé haktuir moris sarani sira iha Timor-Leste, oinsá atu servisu buka haka’as-an atu sai buras hanesan povu ne’ebé forte.
Notísia relevante : Kardeál eleitu Don Virgílio no delegasaun PN to’o ona iha Roma
Papa Francisco hakarak povu Timor-Leste hotu bele moris iha pás nia laran.
“Hak ak iha imi-an valór sira hanesan umanu, família, liu-liu moris iha ksolok laran. Tanba ksolok ne’e efeitu ida hosi Maromak nia grasa atu Nai haraik ba imi ho grasa klosok nian hodi la’o ba oin nafatin,” nia dehan.
Nia mós husu atu labele lakon matak malirin ksolok fiar nian no fó bensaun ba povu tomak.
“Ha’u husu imi atu reza mai ha’u, ha’u fó bensaun ba imi hotu ho fuan no laran tomak. La’o ba oin nafatin, sempre ba oin nafatin. Na’i feto tau matan ba imi hotu,” nia tenik.
Jornalista : Arminda Fonseca
Editora : Julia Chatarina
