iklan

ERMERA, MUNISÍPIU

Autoridade husu kompañia Shanghai Construction halo manutensaun ba Estrada Ermera-Fatubesi

Autoridade husu kompañia Shanghai Construction halo manutensaun ba Estrada Ermera-Fatubesi

Administrador Postu Administrativu Ermera Vila, Munisipiu Ermera, Alexandre dos Santos (Imagem Tatoli/Filomeno Martins.

ERMERA, 09 maiu 2023 (TATOLI) – Autoridade Postu Administrativu Ermera husu Kompañia Shanghai Construction Group (SCG) halo manutensaun ba Estrada diresaun Ermera Vila – Fatubesi tanba komesa aat ba daudaun maske Estrada refere foin mak halo hotu.

Konstrusaun ba Estrada diresaun Ermera Villa – Fatubesi responsabiliza husi kompañia sineza Shanghai Construction Group (SCG) ho medida 11.81 kilometru no finánsia husi Uniaun Europeia

“Kompañia Shanghai Construction Group (SCG) mak sei responsabiliza halo manutensaun ba Estrada ida ne’e. Problema ne’ebé ita hasoru mak udan no anin bo’ot foin lalais iha fulan abril liu ba, kauza Estrada ne’e  aat barak. Kompañia mai haree ona atu halo manutensaun ba Estrada refere,” Administradór Postu Administrativu Ermera Vila, Munisípiu Ermera, Alexandre dos Santos Salsinha ba Tatoli iha nia knaar fatin Ermera Vila, tersa ne’e.

Líder ne’e husu ba kompañia Xineza ne’e bele toma resposabilidade atu nune’e evita Estrada ne’e labele aat ba bebeik.

“Estrada ne’e sedauk 100% entrega ba governu, no sei iha responsabilidade kompañia nian hodi garante manutensaun husi fulan ne’en to tinan ida. Tanba Estrada ne’e foin mak halo sedauk to tinan maibé Estrada ne’e komesa at no laiha kualidade, ida ne’e kompañia nia responsabilidade para halo manutensaun tuir kontratu no regras ne’ebé mak iha,” nia esplika.

Alexandre dehan estrada refere sedauk to tinan ida tanba ne’e kompañia iha responsabilidade tomak hodi halo manutensaun.

“Se nia la kumpri regra ne’ebé mak iha, governu iha dever morál atu fó atensaun ba ida ne’e no ha’u sei bolu nia mai hatan. Karik kompañia la halo manutensaun, ita sei husu nia tanba sa mak nia la halo. Se nia la mai, hanesan administradór postu, hau sei buka nia,” nia akresenta.

Felisberto das Neves, nu’udar Xefe Suku Poetete, Postu Administrativu Ermera Vila mós husu ba kompañia Shanghai atu imediatamente halo manutensaun ba Estrada refere.

“Estrada Ermera Vila – Fatubesi ne’e agora iha kondisaun la di’ak. Konstrusaun ba Estrada ne’e foin mak remata no sedauk inagura maibé komesa at ona,” Líder komunitária subliña.

Nia dehan karik kompañia la halo manutensaun, Ministériu Obras Públika (MOP) tenke foti medida atu obriga kompañia ne’e halo manutensaun ba Estrada refere.

“Ami husu Shanghai Construction tenke mai hadi’a agora atu Estrada ne’e labele at ba bebeik hodi fasilita ita nia komunidade rurál sira. Estrada ne’e importante tanba liga postu adminsitrativu Ermera Vila no Postu Adminsitrativu Hatulia B,” Felisberto salienta.

 

Jornalista: Filomeno Martins

Editora    : Nelia Borges

iklan
iklan

Leave a Reply

iklan
error: Content is protected !!