OÉ-CUSSE, 09 maiu 2023 (TATOLI) – Komisaun Nasionál Eleisaun (CNE, sigla portugés), hamutuk ho Polísia Nasionál Timor-Leste (PNTL) halo apreensaun motorizada iha kampaña hosi partidu Frente Revolusionária Timor-Leste Independente (FRETILIN) iha aldeia Quibiselo, suku Bobometo, sub-rejiaun Oésilo, Rejiaun Administrativa Espesiál Oé-Cusse Ambeno (RAEOA), domingu ne’e.
Motorizada ne’e ho xapa-matríkula 1245.GA, uza hosi funsionariu públiku hosi Sekretaria Formasaun Profisionál Empregu (SEFOPE).
Notísia relevante: PNTL Oé-Cusse sei kontrola funsionáriu uza patrimóniu Estadu partisipa kampaña eleitorál
“Iha loron-domingu, Partidu FRETILIN halo mini-kampaña iha Quibiselo lidera hosi lideransa Lere Anan Timur, CNE observa iha funsionáriu ida utiliza patrimóniu Estadu hanesan motorizada Estadu hodi partisipa iha kampaña ne’e, entaun CNE ho parte PNTL, haree no mós foti kedas motorizada ne’e, agora motorizada ne’e iha hela kuartél PNTL sub-rejiaun Oésilo,” Diretór CNE Oé-Cusse, Tomás Oqui Meta, informa ba jornalista sira iha edifísiu CNE Oé-Cusse, tersa ne’e.
“Kona-bá utiliza patrimóniu Estadu, ha’u hanoin ida-ne’e la’ós keixa, maibé ne’e ami haree ho matan, informa kedas ba PNTL foti kedas depois prosesu ne’e maka hosi parte PNTL sei enkamiña kazu ne’e ba oin, tanba ne’e pekulatu de uzu, hanesan mós krime públiku, ne’ebé sira bele prosesa diretamente ba iha Ministériu Públiku,” nia katak.
Liga kazu ne’e, Komandante PNTL Oé-Cusse, Superintendendente Xefe Polísia, Mateus Assunção Mendes, informa, parte PNTL liuhosi sesaun investigasaun enkamiña prosesu ne’e ba iha Ministériu Públiku.
“Durante kampaña eleitorál, ita konsege prende (halo apreensaun) motorizada Governu ida, utiliza hosi funsionáriu SEFOPE partisipa iha kampaña, prosesu ne’e ami foti ona asaun submete ba iha prosesu iha Ministériu Públiku, no nia na’in mak sei ba responde direita ho nia sansaun la sees hosi prodús koima ba kofre Estadu,” nia katak.
Mateus Assunção, hatete, antes ne’e komandu PNTL hamutuk ho CNC hala’o ona sensibilizasaun liuhosi edukasaun sívika ba públiku, hodi informa, katak lei bandu sidadaun hotu atu labele uza patrimóniu Estadu partidipa iha atividade kampaña eleitorál.
Notísia relevante: CNE rejista keixa rua durante kampaña eleitorál iha Oé-Cuss
Jornalista: Abílio Elo Nini
Editór: Evaristo Soares Martins
