ERMERA, 09 maiu 2023 (TATOLI) – Sidadaun 24 hetan asidente iha dalan uainhira atu tuir kampaña eleitorál partidu Kongresu Nasionál Rekonstrusaun Timor-Leste (CNRT, sigla portugés), iha Gleno, Ermera.
Sidadaun 24 ne’e, na’in 21 hetan asidente karreta bakufila iha Suku Raimerhei, Postu Adminsitrativu Ermera, no na’in tolu hetan asidente monu sai husi karreta tanba karreta odamatan kotuk nakloke iha dalan parte suku Fatubolu, Postu Administrativu Hatulia B, munisípiu Ermera. Sidadaun 24 ne’e inklui feto rua.
Hafoin hetan asidente, Servisu Emerjénsia Médika Munisípiu Ermera (SEMME) transporta kedas sidadaun hirak ne’e ba Sentru Saúde Internamentu Glenu hodi hetan asisténsia médika.
Xefe Sentru Saúde Internamentu Gleno, Alcina Fernandes da Silva haktuir, pasiente na’in 24 ne’e hetan kedas asisténsia husi médiku no maioria iha kondisaun kanek kmaan tanba laiha ida mak tohar. “Só iha pasiente ida mak hetan bubu uitoan iha liman tanba hanehan husi buat todan ruma.”
“Kuaze sira mai ne’e ho trauma kamaan no kanek ki’ikoan. Entaun bainhira sira mai, ekipa Médiku fó kedas atendimentu emerjénsia ba sira no hetan ai-moruk,” Alcina informa ba Tatoli, iha Sentru Saúde Internamentu Gleno, tersa ne’e.
Jerente ne’e dehan, ekipa médiku akompaña no observa pasiente sira-nia kondisaun durante oras rua hafoin fó alta sira.
“Agora dadaun sira iha kondisaun ne’ebé mak di’ak, sira bele fila ba uma ona,” Alcina akresenta.
Iha fatin hanesan, Pasiente Jaime Martins Soares nu’udar vitíma husi asidente ne’e esplika katak asidente iha karreta baskolante bakufila iha Suku Raimerhei ne’e tanba karau mak korta bainhira karreta aranka sa’e subida.
“Bainhira kondutór araka sae subida, karau mós korta tama no karau talin kaet espellu karreta nian. Ho nune’e kondutór labele arranka karreta no ami hakiduk ba kotuk mak karreta baku fila. Ami iha karreta laran nakonu. Maibé Hau-nia kondisaun di’ak laiha kanek bo’ot,” Jaime haktuir.
Jornalista: Filomeno Martins
Editora : Nelia Borges
