iklan

ERMERA, MUNISÍPIU

Korpu Guarda-florestál Ermera tuir formasaun tékniku Floresta

Korpu Guarda-florestál Ermera tuir formasaun tékniku Floresta

Korpu Guarda Floresta Ermera tuir Formasaun Tekniku Floresta (Imagem Tatoli/Filomeno Martins)

ERMERA, 11 maiu 2023 (TATOLI) – Korpu Guarda-florestál liu na’in 20 tuir formasaun Tékniku Floresta iha Edifísiu Guarda-florestál, Gleno-Ermera, hodi hala’o serbisu ho másimu iha terenu.

Objetivu husi treinamentu Tékniku Floresta ne’e mak atu kapasita Korpu Guarda-florestál sira-nia koñesimentu no abilidade hodi hala’o serbisu ho di’ak.

“Formasaun loron tolu ne’e atu kapasita Korpu Guarda-florestál sira, foka liu ba tékniku sira kona-ba floresta, hanesan oinsá sira bele halo viveirus, halo atividade agrofloresta iha komunidade, no sukat ai para hatene kubiku husi kada ai-hun,” Xefe Guarda-florestál Nasionál, João Dasi Manu dos Reis ba Tatoli, iha Edifísiu Guarda-florestál, Munsípiu Ermera, kinta ne’e.

Xefe João Dasi-Manu haktuir katak formasaun refere importante atu hasa’e koñesimentu Korpu Guarda-florestál hodi hala’o mós fiskalizasaun ba produtu florestál sira, hanesan ai-teka, ai-santuku no seluktan. “Formasaun ne’e mós sei ajuda sira halo sosializasaun ba komunidade sira kona-ba kuidadu ambiente, hanesan labele tesi ai, sunu rai, no seluktan”.

“Ba oin ne’e ami sei dezloka sira ba kada suku, atu bele aplika (implementa) koñesimentu ne’ebé mak sira hetan iha formasaun ida ne’e,” Xefe ne’e salienta.

Autoridade florestál ne’e mós esklarese katak alende treinamentu tékniku, Korpu Guarda-florestál hirak ne’e tuir mós treinamentu Polísia Limitada.

“Polísia Limitada katak Korpu Guarda-florestál bele halo kapturasaun no investigasaun maibé tenke iha área floresta,” Dasi-Manu dehan.

Iha fatin hanesan, Xefe Departamentu Territórial Kafé no Plantas Indústria, Domingos Brani Santos rekoñese katak treinamentu ne’e importante tebes hodi ajuda serbisu Korpu Guarda-florestál kuidade ambiente no ai-laran sira ho di’ak.

Xefe Departamentu ne’e hateten munisípiu Ermera iha poténsia ba ai oi-oin, tanba ne’e Governu liuhusi Diresaun Jerál Floresta, Kafé no Plantas Indústria esforsu nafatin hasa’e kapasidade Korpu Guarda-florestál sira nian hodi bele ezekuta programa iha terenu ho di’ak.

“Treinamentu ne’e sei ajuda korpu Guarda-florestál sira hodi prosesa produtu floresta ne’ebé mak ita aprende,” nia tenik.

Notísia relevante:Guarda-florestál Ermera apreende mákina ko’a-ai ilegál haat

Jornalista  : Filomeno Martins

Editora      : Nelia Borges

 

iklan
iklan

Leave a Reply

iklan
error: Content is protected !!