DILI, 12 maiu 2023 (TATOLI) – Sekretariadu Tékniku Administrasaun Eleitorál (STAE), ofisialmente halo distribuisaun materiál sensitivu no la sensitivu ba munisípiu 13, inklui Rejiaun Administrativa Espesiál Oe-Cusse Ambeno no Diáspora hodi selebra Eleisaun Parlamentár iha 21 maiu.
Ministru Administrasaun Estatál (MAE), Miguel dé Carvalho, hateten Governu kontinua reforsa papél órgaun administrasaun eleitorál, tantu Komisaun Nasionál Eleisaun (CNE) no mós Sekretariadu tékniku Administrasaun Eleitorál atu hala’o sira-nia funsaun ho objetivu ne’ebé adekuadu, imparsiál, independente no prodúz rezultadu ne’ebé kredível.
“Ami fahe materiál sensitivu no la sensitivu sira ne’e iha territóriu nasionál no diáspora ba Eleisaun Lejislativa nian”, Miguel de Carvalho, informa iha edifísiu STAE Caicoli, ohin.
Governante ne’e apela ba órgaun eleitorál sira atu servisu ho transparénsia no imparsialidade hodi prodús rezultadu ne’ebé di’ak no hetan konfiansa husi públiku iha órgaun administrasaun estatál nian.
Nia rekomenda ba Polísia Nasionál Timor-Leste atu garante orden públika iha territóriu nasionál tomak.
Iha fatin hanesan, Komandu Operasaun PNTL, Superintendente Xefe, José Soares, hateten membru sira sei asegura distribuisaun materiál sensitivu no la sensitivu iha viajen nasionál ba munisípiu to’o rezultadu finál.
“Polísia Nasionál Timor-Leste iha obrigasaun atu asegura katak asuntu sensitivu no la sensitivu hotuhotu to’o iha munisípiu sira”, nia dehan.
Komandante ne’e mós apela ba ninia membru hotu atu servisu hamutuk ho ekipa no mantein komunikasaun hodi hala’o distribuisaun materiál ho susesu.
Prezidente Komisaun Nasionál Eleisaun (CNE) JoséBelo, ko’alia liu kona-ba importánsia husi Polísia Nasionál Timor-Leste nian, Prezidente autoridade no Administradór postu sira ne’ebé kontinua halo komunikasaun ho órgaun eleitorál sira hodi bele hetan susesu iha eleisaun lejislativa ida ne’e.
Jornalista : Felicidade Ximenes
Editór : Zezito Silva
