iklan

ERMERA, MUNISÍPIU

MPLM sei aloka $100,000 ba kada suku hodi hamenus ki’ak

MPLM sei aloka $100,000 ba kada suku hodi hamenus ki’ak

Kampana MPLM iha Munisípiu Ermera (Imagem Tatoli/Filomeno Martins)

ERMERA, 16 maiu 2023 (TATOLI) – Partidu Movimentu Popular Libertasaun Maubere (MPLM), iha ninia kampaña eleitorál iha Aldeia Poerema, Suku Fatubolu, Postu Administrativu Hatulia B, Munisípiu Ermera kompromete sei aloka $100,000 ba kada suku iha Timor-Laran tomak hodi hakotu ki’ak no lori dezenvolvimentu ba povu iha baze.

Kompromisu polítika ne’e hato’o husi Sekretáriu Jerál MPLM, José Domingus Martins ‘Belak’ iha kampaña dialógu iha aldeia Poerema, tersa ne’e.

“Osan Estadu nian ne’e tenke tau iha povu. Entaun, Orsamentu Jerál Estadu ne’e ita fahe ba kategoria haat. Kategoria haat ne’e mak hanesan kategoria nasionál, munisipál, postu adminsitrativu no suku. Entaun, kada suku ita tenke aloka osan $100,000, kada postu administrativu ita aloka $1,000.000, no ba munisípiu ita aloka $5,000.000,” José esplika.

Nia dehan, Orsamentu Estadu aloka ba Suku sei lori dezenvolvimentu ba baze. “Tanba ne’e, povu ba dere de’it Xefe Suku nia odamatan mós osan iha ona. Entaun dezenvolvimentu la’o, ekonomia mós la’o no ki’ak lakon.”

“$100,000 kada suku ne’e sei aselera dezenvolvimentu báziku. Ita lalika hein ba nasionál hodi lori dezenvolvimentu mai. Entaun, ho osan ne’e, kada suku bele rezolve netik problema Estrada, bee-moos, no seluktan,” nia esplika.

José subliña katak osan aloka ba postu adminsitrativu sei lori dezenvolvimentu ba kada postu iha Timór laran tomak. “Ida ne’e bele dezenvolve postu hotu iha Timór laran tomak sai sidade.”

“Se ita aloka $5,000.000 ba kada munisípiu, Ermera laran bele sai sidade tomak tiha. Entaun ita lalika hein osamentu husi nasionál,” nia dehan.

José garante sei fó subsídiu ba estudante no povu ai-leba nia oan sira. “Kada estudante sei simu $50 kada fulan, no joven sira mós sei simu $50 kada fulan. Entaun mehi hakotu ki’ak ne’e akontese.”

Nia informa karik MPLM kaer ukun, molok 2025, Estadu bele rekruta ona funsionáriu 50,000, membru F-FDTL 50,000, no membru PNTL 50,000. “Entaun, Vota ba numeru 14, vota ba moris di’ak no vota ba hakotu ki’ak.”

 

Jornalista: Filomeno Martins

Editora: Nelia Borges

iklan
iklan

Leave a Reply

iklan
error: Content is protected !!