iklan

ERMERA, MUNISÍPIU

PR hakarak esporta kafé-ut ba rai liu

ERMERSA, 17 maiu 2023 (TATOLI) – Partidu Republikanu (PR) kompromete katak bainhira kaer ukun sei harii indústria no fábrika kafé iha munisípiu Ermera hodi dezenvolve kafé Ermera , atu nune’e Esporta mak kafé uut, la’ós kafé musan.

Kompromisiu Polítika ne’e hato’o husi Vise Prezidente Partidu Republikanu, Francisco Barreto, iha Gleno, Munisípiu Ermera, kuarta ne’e.

“Agora dadauk ne’e ita sedauk iha indústria kafé ida iha Timor-Leste. Entaun, ita nia polítika ida mak sei loke fábrika kafé iha Timor-Leste, liu-liu iha Ermera atu nune’e ita Esporta kafé uut mak ba rai liur, la’ós kafé musan,” Francisco esplika.

PR mós kompromete sei fó subsídiu entre $50 to 100 kada fulan ba komunidade sira hodi halo reabilitasaun ba kafé tuan sira ne’ebé mak la produtivu ona: “Se povu fo fiar ba PR, ami sei fó subsídiu $100 kada ektare to tinan rua ka tolu.”

Nia dehan subsídiu ne’e sei sustenta  kafekultór sira-nia moris hodi hein to kafé fó hikas produsaun ne’ebé mak di’ak: “Subsídiu ne’e sei ajuda komunidade sosa mina, foos no buat seluk hodi sustenta sira-nia moris.”

Entertantu, governu atuál, liu husi orsamentu retifikiativu aloka ona tokon $6.4 hodi halo reabilitasaun ba plantasaun kafé tuan sira iha Timor-Laran tomak.

Program reabilitasaun ne’e kobre munsípiu sira mak hanesan Ermera, Aileu, Liquiça, Ainaro no Manufahi.

Iha kampaña dialógu ne’e, PR mós kompromete dezenvolve Estrada rurás sira hodi fasilita komunidade rurál faan sira-nia produtu ba merkadu municipal sira no Dili.

“Komunidade barak iha produtu atu mai faan, maibé Estrada mak la di’ak. Tanba ne’e se povu fó fiar PR liu bareira, ami-nia tarjetu mak infraestrutura rurál, liu-liu Estrada,” Francisco konklui.

 

Jornalista: Filomeno Martins

Editora: Nelia Borges

iklan
iklan

Leave a Reply

iklan
error: Content is protected !!