DILI, 20 maiu 2023 (TATOLI) – Prezidente Komisaun Organizadora ba Selebrasaun Loron Restaurasaun Independénsia Timor-Leste (TL) ba dala XXI iha Suku Bauro Mencio Bernardino, hateten loron 20 maiu nu’udar momentu istóriku ba povu TL, tanba ne’e joven sira sebra loron ida ne’e liuhosi atividade desportu, hosi rezultadu ida ne’e, Klube FC Iralafai mak sai kampiaun ba jogu futsal.
“Loron Restaurasaun Independénsia Timor-Leste, 20 maiu 2023 ba dala XXI hanesan loron istóriku ba povu Timor-Leste tanba loron ida ne’e mundu rekoñese Timor-Leste nia ezisténsia nu’udar nasaun ne’ebe livre no independente hanesan nasaun seluk iha mundu. Ho nune’e ami juventude Suku Bauro, Postu Administrativu Lospalos Munisípiu Lautem ho loron boot ida ne’e ami juventude sira iha inisiativa atu loke eventu desportivu iha ami-nia suku no ami juventude sira hamutuk ho lider komunitáriu no komunidade Suku Bauro tomak hodi halo serimónia hasa’e no hatun bandeira nasionál iha ami-nia suku refere´´, Mencio Bernardino hateten ba Ajénsia Tatoli, hafoin ensera atividade desportivu, ohin.
Objetivu hosi atividade ida ne’e mak atu hanoin hikas funu na’in no martir sira nia mehi hodi kontinua valoriza no tane as prinsípiu fundamentál ba hari’i rai doben TL, atu hametin lasu amizade entre komunidade Suku Bauro oan sira no mós ho komunidade sira iha aldeia viziñu.
Atividade ne’ebé efetua hodi Komemora Loron Restaurasaun Indepedénsia mak Futsal Salaun Mane no Feto, Volleybol Feto, Sertame, Dada tali, Halai Karon no lao ho Berlindus.
Mencio informa, jogu futsal ne’ebé sai 1º kampiaun mak FC Iralafai A, 2º lugar FC Raça, 3º Lugar FC Paimatar/Punu no mellór markadór Riky husi FC Paimatar/ Punu.
Aleinde ne’e, iha mós jogu volleyball ne’ebé sai 1º lugar mak FC Irakuru, 2º lugar GB United no 3º lugar Calvariu.
Nune’e mós, iha atividade sertame, 1º lugar mak Aldeia Iralafai husi Eskola EBF Kery Laran Sabalae, 2º lugar Aldeia Luarai husi Eskola Dom Bosco Fuiloru, 3º lugar hosi Aldeia Iralafai Eskola EBF Kery Laran Sabalae no 4º lugar hosi Aldeia Sepelata husi Eskola EBF Kery Sabalae.
Konselleiru Armindo Nunes, agradese ba inan aman, juventude no parte hotu ne’ebé partisipa iha atividade ida ne’e, espera katak tinan-tinan hothotu hamutuk hodi selebra loron boot liuhosi ativadade hotu ne’ebé mak nesesáriu atu realiza.
Atividade ida ne’e durante fulan ida nia-laran no hetan apoiu hosi Ministériu Komérsiu no Indústria ho valór $ 2000.
TATOLI
