DILI, 07 juñu 2023 (TATOLI)–Primeiru-Ministru (PM), Taur Matan Ruak, konvoka membru Governu sira hotu, kuarta ne’e, ba sorumutuk ikus Konsellu Ministru (KM) VIII Governu Konstitusionál.
“Durante sorumutuk, Primeiru-Ministru halo retrospetiva mandatu Governu nian, rekoñese serbisu pozitivu ne’ebé alkansa ona hosi ezekutivu no nia agradese ba kontribuisaun no dedikasaun hosi membru ezekutivu sira hotu,” Ministru Prezidénsia Konsellu Ministru, Fidelis Manuel Leite Magalhães, relata hafoin ramata reuniaun KM ikus, iha Palásiu Governu.
Notísia relevante : Fó Pose Membru Governu Na’in-21, Xefe Estadu Husu Servisu ho Efisiésia no Efikásia
Nia dehan, iha reuniaun ne’e aprezenta ona relatóriu finál mandatu VIII Governu nian hosi tinan 2018 to’o 2023.
“Publikasaun ida ne’ebé deskreve atividade no rezultadu prinsipál ezekutivu sira-nian hahú hosi kedas bainhira sira simu pose, nune’e mós dezafiu hirak ne’ebé sira hasoru inklui rekomendasaun sira ba futuru,” nia akresenta.
Iha aprezentasaun relatóriu ne’e, Ministru Fidelis salienta maski hasoru difikuldade no dezafiu sira durante mandatu maibé konsege konkista rezultadu balun durante mandatu.
“Mandatu VIII Governu sei to’o iha sesaun dahuluk lejizlatura foun iha Parlamentu no tuir-mai ho formasaun ba IX Governu maibé VIII Governu sei tau-matan to’o momentu pose Primeiru-Ministru no membru Governu sira,” nia adianta.
Jornalista : Antónia Gusmão
Editora : Julia Chatarina
