Embaixada Cuba realiza festivál desportu
DILI, 17 juñu 2023 (TATOLI)—Embaixada Cuba iha Timor-Leste realiza festivál desportu hanaran Cayman to Cayman, hodi selebra tinan-21 relasaun bilaterál ho Timor-Leste.
Embaiaxadora Cuba ba Timor-Leste, Grisel Aldama Iniss, hateten, atividade ne’e nu’udar afirmasaun ida atu hametin liután relasaun bilaterál entre país rua ne’ebé la’o desde restauransaun independénsia Timor-Leste to’o ohin loron ne’ebé kompleta ona tinan-21.
“Cuba nu’udar nasaun daruak ne’ebé Timor- Leste rekoñese, nune’e ita hato’o parabéns ba Timor-Leste nia aniversáriu 21 restaurasaun independénsia, ne’ebé hanesan mós estabelesimentu relasaun entre país rua, inklui rezultadu Eleisaun Parlamentár foin lalais ne’e,” Grisel dehan durante halo intervensaun iha festivál desportu, iha resintu Sekretaria Estadu Juventude no Desportu (SEJD), Lecidere, sábadu ne’e.
Atividade hahú ho la’o ain saudável, hahú hosi Embaixada Cuba to’o iha SEJD, ne’ebé partisipa hosi entidade oin-oin.
Iha ámbitu ne’e, médiku Cubanu fó tratamentu gratuita ba komunidade tomak no halo esposizaun fotografia Che Guevara.
Festivál ne’e ideia hosi SEJD hamutuk ho Embaixada Cuba, ne’ebé sempre hetan apoiu hosi Reprezentante ONU iha Timor-Leste.
“Timor-Leste no Cuba hanesan illa rua ne’ebé iha forma jeográfika hanesan Cayman ida, maski lokaliza iha latitude diferente, maibé mai ho pensamentu ida atu oferese bem-estar no dezenvolvimentu ba populasaun. Ho ida-ne’e, Cuba apoiu hodi kumpre objetivu dezenvolvimentu sira ne’ebé Timor-Leste estabelese hodi atinje meta ba ajenda 2030 nian. Agradese ba kooperasaun no interese hosi autoridade sira, ba relasaun bilaterál entre país rua,” Embaixadora realsa.
Notísia relevante : FATL-Cuba realiza formasaun atletizmu ba ema na’in-30 iha Bobonaro
Selebrasaun loron amizade país rua ne’e iha tempu hanesan selebra mós loron moris Ernesto Guevara, koñesidu liu ho naran Che Guevara, ne’ebé nu’udar sidadaun Argentina-Cubanu, hanesan revolusionáriu, polítiku, soldadu, jornalista, hakerek-na’in no funu-na’in, guerilla tanba ho nia pensamentu revolusionáriu mak konsege hola parte iha funu armadu iha foho Sierra Maestra.
“Nia la’ós de’it hanesan mane ho ideia kle’an, maibé mós ho asaun, ne’ebé la’ós de’it luta ba liberdade povu Cuba nian, maibé mós luta ba povu seluk nia independénsia. Tanba ne’e mak merese hetan domin no respeitu boot,” nia tenik.
Nune’e, Embaixadora komprometidu sei kontinua apoia Timor-Leste iha kualker área kooperasaun.
“Pensamentu hosi Che Guvera rasik, ne’ebé dehan revolusionáriu loos ne’e dirije hosi sentimentu domin boot, ne’ebé ha’u hatutan tan katak Cuba la oferese buat ne’ebé sei iha, maibé fahe buat ne’ebé nia iha, tanba ne’e mak ami sei kontinua fó apoiu ba ami-nia país irmaun,” Grisel afirma.
Iha fatin hanesan, Sekretáriu Estadu Juventude Desportu, Abrão Saldanha, hateten, eventu ne’e realiza ba datoluk, ba tinan ne’e atu komemora relasaun bilaterál país rua ba dala-21.
“Depois ita ukun-an hahú hosi restaura ita-nia independénsia, Cuba sempre iha ita-nia sorin. Cuba nu’udar nasaun ne’ebé iha relasaun di’ak tebes desde Timor-Leste desde restaurasaun independénsia, médiku no soldadu Cubanu ho bata mutin mai halo tratamentu ba timor-oan sira to’o iha área remota,” nia haktuir.
Aleinde ne’e, liuhosi kooperasaun bilaterál, Governu Timor-Leste haruka timor-oan sira bá estuda medisina iha Cuba no Governu Cuba konsege forma timor-oan sira estuda no to’o agora timor-oan barak mak sai ona médiku.
Nune’e mós, Governu Cuba liuhosi profesór Cuba iha Timor konsege ajuda inan no aman analfabetu no Cuba mos ajuda harii fakuldade medisina iha Universidade Nasionál Timor-Leste (UNTL).
Abrão Saladanha rekoñese médiku Cubanu ho domin tomak ba Timor-Leste, hamutuk ho médiku timor-oan sira iha liña frente ajuda Timor-Leste kontra prevensaun ba surtu COVID-19 iha situasaun pandemia.
“Cuba hato’o prontidaun hodi ajuda Timor-Leste dezenvolve desportu iha Timor-Leste tanba Che Guevara no Fidel Castro konsidera desportu la’ós hanesan atleta maibé ne’e direitu ba ema hotu hosi ema kiik, joven to’o katuas no ferik sira. Ha’u hakarak lori Governu no Estadu nia naran, agradese barak Cuba liuhosi kooperasaun sira ne’ebé mak ohin ita selebra ita-nia relasaun hodi kontinua metin,” nia otimista.
Jornalista : Natalino Costa
Editora : Julia Chatarina
