iklan

DESPORTU, BOBONARO, HEADLINE, MUNISÍPIU

FATL-Cuba realiza formasaun atletizmu ba ema na’in-30 iha Bobonaro

FATL-Cuba realiza formasaun atletizmu ba ema na’in-30 iha Bobonaro

Prezidente Federasaun Atletismu Timor-Leste, Afranio Xavier, reprezentante Prezidente Autoridade Munisípiu Bobonaro, ho komandante PNTL maunisípiu Bobonaro, Superintendente Antoninho Mauluta, foto hamutuk ho treinadór no arbitrajen na'in-30 hafoin abertura formasaun atletizmu nível bázika. Imajen Tatoli/Sérgio da Cruz.

BOBONARO, 05 dezembru 2022 (TATOLI) – Federasaun Atletizmu Timor-Leste (FATL), hamutuk ho formadór atletizmu na’in-rua hosi Cuba, segunda ne’e realiza formasaun atletizmu bázika ba Bobonaro-oan na’in-30 atu sai sai treinadór no arbitrajen hodi lidera jogu iha futuru.

Prezidente Federasaun Atletizmu Timor-Leste, Afranio Xavier, esplika, formandu hirak-ne’e mai hosi postu administrativu neen no kada postu ema na’in-lima komposta hosi treinadór na’in-20 no arbitrajen na’in-20.

Nia reforsa, formasaun ne’e sei realiza iha estádiu futeból Malibaca, Maliana, durante semana ida, partisipante sira sei hetan matéria bázika ho númeru disiplina hamutuk 47 foka ba teória maibé barak liu prátika.

Notísia relevante: SEJD hili Stadium Café Gleno sai sentru treinamentu ba Atletismu

“Objetivu hosi formasaun ida atu forma ita-nia treinadór no arbritrajen sira. Ita fó formasaun ba treinadór sira hahú hosi otas nurak, no mós profesór edukasaun fízika sira, depois arbitrajen, ita lori sai mai hosi postu administrativu atu nune’e aban bainrua karik iha atividade governu lokál realiza iha suku, sira mak iha kompeténsia atu dirije jogu, liuliu ba modalidade atletizmu,” Afranio Xavier, inorma ba jornalista sira, iha Jináziu Maliana.

Afranio subliña, atividade formasaun nu’udar programa kontinuasaun tinan 2021 nian, parte ida mós oinsá atu responde ba polítika Sekretaria Estadu Juventude no Desportu nian, katak desportu tenke mai hosi baze, tanba rekursu umanu mak sai xave importante oinsá atu dezenvolve desportu hahú hosi suku to’o nasionál.

Tanba kada tinan governu aloka orsamentu boot ba desportu maibé haluha halo investimentu ba rekursu umanu sira iha territóriu nasionál ba modalidade hotu-hotu ne’ebé eziste inklui federasaun atletizmu.

Ne’e duni Afranio apela ba partisipante sira atu nafatin iha seriedade partisipa formasaun ne’e to’o remata, tanba governu hahú ona fihir atleta sira hosi baze.

“Ha’u esperu ita-boot sira mai ho fuan, domin no pensamentu ida katak Bobonaro tenke ba oin ho atletimu, tanba oportunidade ne’e sei mai, maibe la mai beibeik, tanba ida-ne’e mak kontinuasaun ne’e sei iha,” nia katak.

Reprezentante Prezidente Autoridade Munisípiu Bobonaro, António Soares, agradese ba governu liuliu Federasaun Atletizmu tanba bele realiza ona atividade nível bázika ne’e.

“Ida-ne’e hanesan oportunidade ida mai munisípiu Bobonaro tanba durante ne’e sei la hatene regra modalidade atletizmu nian, tanba ne’e ha’u husu ba imi hotu ne’ebé tuir formasaun ne’e halo-tuir saida mak ita-nia formadór sira halo hodi nune’e bele implementa iha ita-nia munisípiu, tanba tuir kontratu SEJD ho MAE, desportu komunitária entrega ona ba munisípiu sei entrega osan ba postu idak-idak,” nia katak.

Enkuantu totál orsamentu ne’ebé SEJD aloka ba atividade formasaun r ne’e kuaze rihun $50, sei kobre munisípiu neen ne’ebé halo ona abertura iha Baucau no sei ensera iha Rejiaun Espesiál Oe-Cuse Ambeno (RAEOA).

Notísia elevante: SEJD transfere ona subsídiu atleta Felisberto ba konta FATL

Jornalista   : Sérgio da Cruz

Editór         : Evaristo Soares Martins

iklan
iklan

Leave a Reply

iklan
error: Content is protected !!