DILI, 11 jullu 2022 (TATOLI)— Sekretáriu Estadu Juventude no Desportu (SEJD), transfere ona subsídiu ba atleta hosi modalidade atletizmu, Felisberto de Deus, ne’ebé hetan segundu lugar iha eventu SEA Games Vietname ba konta Federasaun Atletizmu Timor-Leste (FATL).
Sekretária Jerál FATL, Filomena Barros dos Reis, hateten subsídiu ba Atleta Felisberto no nia treinadora tama ona iha konta bankária FATL nian, ne’ebé tempu besik transfere tutan fali ba iha konta atleta ho nia treinadór.
“Subsídiu ba ita nia atleta Felisberto mak Governu transfere ona mai konta federasaun nian, loron rua tan bele tama ona ba konta atleta nian,” Sekretária Jerál FATL ne’e hateten ba Jornalista-sira iha Jináziu Dili, segunda ne’e.
Nia dehan, antes ne’e Governu mós fó ona bolsa estudu ba atleta hodi apoia nia eskola liuliu iha Universidade Nasionál Timor-Lorosa’e (UNTL).
“Kona-ba nia bolsa estudu Governu fó apoia mós, maibé ne’e osan la mai iha ami, bainhira Felisberto presiza osan ruma ba nia eskola mak mai iha FATL, hafoin ami halo proposta haruka ba SEJD hodi fó osan ba nia atu selu nia eskola,” nia dehan.
Iha fatin hanesan, Atleta Felisberto de Deus, sente kontente ho subsídiu ne’ebé mak SEJD fó ba nia, hanesan maneira ida hodi bele haka’as an liután iha eventu seluk tuir mai.
“Ha’u sente kontente no orgullu ba Governu bele fó ona subsidiu mai ha’u. Tanba iha eventu SEA Games ne’ebé hatudu prestasaun di’ak, maibé sei la hotu iha ne’e, ha’u nafatin treinu atu kompete iha eventu sira tuir mai,”nia kompromete.
Entretantu, Treinadór Atleta ne’e, Odete Belo, mós agradese ba Governu bele fó ona prémiu ba sira hanesan motivasaun ida atu fó treinu ba atleta-sira ho di’ak hodi hamorin nasaun nia naran iha jogu rejionál no internasionál.
“Ami agradese tebes ba ita nia Governu, ami sei haka’as an nafatin hodi fó treinu ba ita nia atleta sira ho di’ak atu ba kompete iha jogu internasional sira, liuliu bele hamorin Timor-Leste nia naran,” Trinadora ne’e kompromete.
Orsamentu ne’ebé Felisberto simu hosi Governu tanba hatudu prestasaun di’ak no sai segundu lugar dala rua hanesan kurida metru 5.000 no metru 10.000 hodi oferese medalla osan mutin rua.
Totál subsídiu ne’ebé atleta ne’e hetan hosi Governu hamutuk $7,500.00 no Treinadora, Odete Belo mós simu prémiu ho totál $5,000.00
Notísia relevante: Governu prosesa ona subsídiu ba atleta hetan medalla iha SEA Games
Jornalista: Hortencio Sanchez
Editór : Florencio Miranda Ximenes