DILI, 27 juñu 2023 (TATOLI)—Diretór Jerál Turizmu iha Ministériu Turizmu Komérsiu no Indústria (MTKI), Jelino Soares, informa, empreza Cocactius, Unipessoal Lda hahú fali serbisu hadi’a uma gazebo sira ne’ebé a’at iha Areia Branca.
“Iha semana rua liubá, empreza Cocactius Unipessoal Lda hahú serbisu fali hadi’a uma gazebo sira ne’ebé a’at iha Areia Branca,” Jelino Soares, ba Agência Tatoli, iha nia knaar-fatin Farol, Dili tersa ne’e.
Notísia relevante : MTKI sei loke fali konkursu públiku foun ba reabilitasaun gazebo Areia Branca
Nia dehan, reabilitasaun ne’e hahú ona iha tinan 2022 tuir polítika VIII Governu nian, maibé área ne’e kompete ba Autoridade Munisípiu Dili.
“Tanba hetan krítika hosi públiku mak MTKI foti osan hosi manutensaun sítiu sira-nian hodi halo reabilitasaun. Ita konsege kontrata empreza Suai Indah, maibé tanba orsamentu kiik, sira hadi’a de’it mak haris-fatin ida, trotoár no tuur fatin, maibé uma gazebo seidauk. Tinan ne’e mak foin kontratu fali empreza Cocactius Unipessoal Lda hodi halo reabilitasaun uma gazebo ne’e rasik,” nia akresenta.
Aleinde reabilita, empreza harii foun uma gazebo hamutuk 15, kompostu hosi boot lima no kiik 10.
“Ita prevee orsamentu ba uma gazebo iha tinan ne’e hamutuk $68.762, tanba uma gazebo boot lima ne’e ita sei sosa hosi Indonézia no mai monta de’it, enkuantu gazebo kiik 10 ita sei sosa materiál lokál hosi rai-laran mak halo,” Diretór dehan.
Jornalista : Arminda Fonseca
Editora : Julia Chatarina
