MTKI sei loke fali konkursu públiku foun ba reabilitasaun gazebo Areia Branca
DILI, 20 fevereiru 2023 (TATOLI)— Ministériu Turizmu Komérsiu no Indústria (MTKI), tinan ne’e sei loke fali konkursu públiku foun ba kompañia manán na’in atu halo reabilitasaun ba uma gazebo sira iha Areia Branca-Cristo Rei.
Diretór Jerál Turizmu, Jelino Soares, hateten reabilitasaun ba uma gazebo iha Areia-Branca ne’e rasik iha tinan 2022 tuir polítika VIII Governu nian la prevee orsamentu atu halo reabilitasaun. Tanba área refere ninia kompeténsia ba Autoridade Munisípiu Dili, maibé tanba hetan krítika hosi públiku maka MTKI foti fali osan hosi manutensaun sítiu sira hodi halo reabilitasaun.
Notisia relevante : Reabilitasaun uma gazebo Areia Branca sei finaliza iha tinan 2023
“Ita konsege kontratu kompañia Suai Indah, maibé orsamentu kiik entaun sira hadi’a de’it mak haris-fatin ida, trotoár, tuur fatin maibé ba uma gazebo ne’e rasik seidauk. Tinan ne’e mak ita loke fali konkursu públiku foun ba kompañia manán na’in hodi halo reabilitasaun,” Jelino Soares koalia ba Agência Tatoli, iha nia-knaar fatin Farol, Dili, segunda ne’e.
Nia dehan, orsamentu ne’ebé prepara atu halo reabilitasaun ba uma gazebo ne’e rasik hahú hosi $61.000 to’o $70.000.
“Ita tau orsamentu $70.000 tanba uma ne’ebé ita sei halo reabilitasaun ne’e hamutuk 11. Hosi total ne’e, lima halo boot ho nia materiál ka sasán ne’e, ita sei sosa hosi Surabaya, Indonézia mai mak monta de’it no neen seluk ita sei sosa materiál lokál mak halo inklui konkursu públiku ba hadi’a liña eletrisidade hosi Cristo Rei to’o mai Areia-Branca,” nia dehan.
Jornalista : Arminda Fonseca
Editora : Armandina Moniz
