DILI, 10 jullu 2023 (TATOLI) – Polísia Servisu Investigasaun Kriminál (PNSIK) deskobre no kaer ona konta facebook ho naran Jonn Malic iha área Mota Kiik, Suku Hera, Postu Administrativu Cristo Rei, Munisípiu Dili. Jonn Malic hanesan ema deskoñesidu ida ne’ebé tolok atuál Primeiru-Ministru Xanana Gusmão iha rede sosiál facebook.
PNSIK kaer diretamente suspeitu no transporta hosi Hera iha segunda (10/7) tuku 8:00 dader, ba Departamentu Investigasaun (DIK), Komandu Jerál PNTL hodi submete ba prosesu identifikasaun.
“Bazea ba informsaun iha media sosiál iha facebook, ita-nia pesoál timoroan balun tolok ita-nia Primeiru-Ministru Xanana Gusmão iha media sosiál, nune’e Investigsaun Kriminál buka tuir informasaun ne’e no lokaliza kedas nia hela fatin no deteta duni nia númeru telefone katak suspeitu mak uza konta facebook hodi tolok ita-nia atuál Primieiru Ministru. Agora dadaun ema ne’e ami notifika ona para fó nia deklasaun bazea ba públikasaun ne’ebe mak nia halo”, Xefe Departementu DIK, Komandu PNTL Superintendente Polísia João Belo dos Reis ba jornalista sira iha Komandu Jerál PNTL, segunda, ohin.
Suspeitu ne’ebé tolok lider Xanana Gusmão hosi Postu Administrativu Uatulari, Munisípiu Viqueque ne’ebé agora daudaun hela iha Hera Munisípiu Dili.
Jornalista: Natalino Costa
Editór : Zezito Silva
